Оқушыларға үзілісте де телефон қолдануға тыйым салынуы мүмкін

Қазақстан мектептерінде оқушыларға смартфонды тек сабақ кезінде ғана емес, үзілісте де қолдануға тыйым салу жоспарланып отыр. Тиісті түзету «Педагог мәртебесі және білім беру мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» заң жобасына енгізілген.

Құжатқа Мәжіліс депутаттары бастамашы болған. Заң жобасына сәйкес, орта білім беру ұйымдарында білім алушылар мен тәрбиеленушілердің ұялы байланыс құралдарын пайдалану тәртібін білім беру саласындағы уәкілетті орган әзірлеп, бекітеді.

Сондай-ақ «Білім туралы» заңның 47-бабына өзгеріс енгізу ұсынылып отыр. Жаңа редакцияда орта білім беру ұйымдарында оқу үдерісі кезінде білім алушылар мен тәрбиеленушілердің ұялы байланыс құрылғыларын қолдануына жол берілмейтіні көрсетілген. Ерекше жағдайлар уәкілетті орган бекітетін ережелерде айқындалады.

Қазіргі қолданыстағы нормада смартфондарды тек қысқа мерзімді оқу жоспарларында көзделген оқу мақсатында пайдалануға рұқсат етілетіні жазылған.

Депутаттардың пікірінше, телефондарды сабақ уақытында ғана емес, үзіліс кезінде де шектеу кибербуллинг пен зиянды контенттің таралу қаупін азайтып, мектептегі тәртіп пен қауіпсіздікті нығайтуға мүмкіндік береді.