Оқушылардың мектепке үйден тамақ апаруына бола ма?

Егер тегін тамақтың сапасына ата-аналардың көңілі толмаса, балаларына мектепке үйден тамақ салып жіберсе бола ма? Бұл сұраққа ҚР Оқу-ағарту министрлігі Балалардың құқықтарын қорғау комитетінің төрайымы Насымжан Оспанова жауап берді, деп хабарлады Informburo.kz.

Оның айтуынша, мектептерде тамақтану ережелері нормативтік-құқықтық актілермен реттелген. Бұл құжаттарда ата-аналардың балаларына үйден тамақ (ланчбокс, арнайы пакет немесе басқа да нұсқалар) салып жіберуіне рұқсат етілген.

"Сондықтан ата-аналар балаларының тамақтануын өздері ұйымдастыра алады. Ланчбокс болсын, арнайы қаптама болсын – айырмашылығы жоқ", – деп түсіндірді Оспанова.

Бірақ кейбір мектепте ата-аналарға үйден тамақ жіберуге тыйым салынып жатады. Себебі әкімшілік мемлекеттен бөлінген қаржыны есептеуде қиындықтар туындауы мүмкін деп алаңдайды.

"Мектептердің қаржыландыруға қатысты алаңдауы орынды. Қазір балалардың тамақтануын тіркеуге арналған арнайы нысандар бар. Оларда қанша бала тегін тамақтанғаны есепке алынады. Сондықтан бөлінген қаражаттың қайда жұмсалғаны туралы алаңдауға негіз жоқ", – деп мәлімдеді комитет басшысы.

Ата-аналар мектеп басшылығына өз балаларының тегін тамақтанудан бас тартатынын ескертіп қойса болады.