Оксфорд алғашқы шетелдік хабын Қазақстанда ашпақ

Қазақстанда Оксфорд университеті негізінде зерттеу институты құрылмақ. Әлемге әйгілі жоғары оқу орны бұған дейін шетелде өкілдік ашпаған. Алайда енді отандық академиялық орта­мен тығыз әріптестік орнатып, Астанада ашылатын Оксфорд хабы аясында бірлескен ғылыми жобаларды іске асыруды жоспарлап отыр. Бұл туралы 24KZ хабарлады.

Биыл Қазақстанда жұмысын бастайтын Оксфорд хабы 32 колледж және британдық университеттің 100-ге жуық институтымен серіктестік орнатуды көздейді. Жоба тәжірибе алмасу, білім беру, консалтинг және бірлескен ғылыми зерттеулерді қамтиды. ҚР ғылым және жоғары білім министрі Саясат Нұрбек бұл бастаманы соңғы жылдардағы ең маңызды нәтижелердің бірі деп атады.

Министрдің айтуынша, Астанада құрылатын алаң халықаралық деңгейде білім мен ғылымды дамытуға серпін береді.

«Бұл – Оксфорд тарихындағы алғаш рет шетелде осындай форматтағы орталықтың ашылуы», – деді ол.

Сонымен қатар Coursera халықаралық онлайн-платформасымен ынтымақтастық кеңейтіледі. Бірлескен жоба аясында Қазақстандағы 95 университеттің студенттері жасанды интеллект, технологияларды басқару және блокчейн бойынша заманауи курстарға қол жеткізеді. Бұл бағытта Oxford Saïd Online бизнес-мектебі де қатысады.

Кездесуде тараптар AI-Sana бағдарламасы шеңберіндегі әріптестікті, сондай-ақ Болашақ бағдарламасымен оқып жатқан қазақстандық ғалымдардың Оксфордта ғылыми тағылымдамадан өту мүмкіндіктерін де талқылады. Жоба Қазақстандағы ғылым мен жоғары білімнің халықаралық ықпалдастығын күшейтуге бағытталған.