Назарбаев Университеті Times Higher Education рейтингінде бірден 100 сатыға көтерілді

Назарбаев Университеті (NU) беделді Times Higher Education (THE) World University Rankings жаһандық рейтингінде өз көрсеткішін қатарынан екі жыл бойы 100 сатыға жақсартып, жалпы 200 позицияға жоғарылады. Нәтижесінде отандық оқу орны әлемдік университеттердің үздік 17 пайызының қатарына енді.

2024 жылы рейтингтің 501–600 диапазонында болған NU кейінгі циклде 401–500 тобына көтерілген еді. Ал биылғы рейтинг қорытындысы бойынша оқу орны 376–400 диапазонына еніп, Қазақстан мен Орталық Азия өңіріндегі көшбасшылық орнын сақтап қалды.

Биылғы THE World University Rankings рейтингіне 118 елден рекордтық 2 297 университет қатысты. Өскен халықаралық бәсекелестікке қарамастан, NU соңғы екі жылда ТОП-23 пайыздық көрсеткіштен ТОП-17 пайызға дейін ілгеріледі.

Бағалау білім беру сапасы, зерттеу ортасы, ғылыми зерттеулер сапасы, халықаралық ашықтық және индустриямен өзара іс-қимыл сияқты бес негізгі бағыт бойынша жүргізіледі. Назарбаев Университеті барлық бағыттар бойынша дерлік көрсеткіштерін жақсартты. Әсіресе ғылыми зерттеулердің сапасы бойынша жоғары нәтиже көрсетіп, Женева университеті (University of Geneva), Аризона университеті (University of Arizona) және Рочестер университетімен (University of Rochester) тең деңгейге жетті.

«Ең алдымен, барша NU ұжымын және Қазақстанды осы нәтижемен құттықтаймын. Алғаш рет қазақстандық университет әлемдік рейтингтердің бірінде мұндай деңгейге көтеріліп отыр. Бұл - тек біздің оқу орнымыз үшін емес, еліміздің жоғары білім беру жүйесі үшін де маңызды жетістік. Бұл нәтиженің артында оқытушылардың, зерттеушілердің, студенттер мен қызметкерлердің көпжылдық еңбегі тұр», - деді NU президенті Вакар Ахмад.

Сондай-ақ оқу орнына деген талапкерлердің қызығушылығы да артып келеді. Биыл университетке түсуге 12 мыңға жуық адам өтініш берген, ал шетелдік студенттерді қабылдау көрсеткіші рекордтық деңгейге жеткен. Түлектердің жұмысқа орналасу деңгейі 95 пайыздан асады.