Мұғалімдерді аттестаттау жүйесіне маңызды түзету енгізілмек

Ауыл әкімдерінің қатысуымен өткен диалог-платформада Оқу-ағарту министрі Жұлдыз Сүлейменова мұғалімдерді аттестаттау қағидалары қайта қаралып жатқанын айтты. Бұл жөнінде inbusiness.kz жазды.

Кездесу барысында ауыл әкімдері магистратура тәмамдаған педагогтерге біліктілік санатын автоматты түрде беру жөнінде ұсыныс білдірді. Алайда министр бұл бастамаға қарсы пікір білдіріп, ұстаздардың кәсіби деңгейі нақты тәжірибесі мен сабақ беру сапасына қарай бағалануы қажет екенін атап өтті.

«Мемлекет басшысы Қасым-Жомарт Тоқаев педагогтерді қорғау және қолдау міндетін қойды. Қазір “Педагог мәртебесі туралы” заңға өзгерістер енгізіліп жатыр. Министрлік ұстаздар қауымының ұсыныстарын ескере отырып, аттестаттау қағидаларын қайта қарау мәселесін пысықтайды. Соңғы уақытта ұстаздардың авторлық бағдарламасына қатысты сұрақтар жиі көтерілуде. Бұл бағытта да нақты шешім қабылданады», – деді Жұлдыз Сүлейменова.

Бұған дейін Шығыс Қазақстан облысында 200-ге жуық «педагог-зерттеуші» санатындағы мұғалімдердің біліктілік деңгейі төмендетіліп, «педагог-эксперт» санатына ауыстырылған. Бұл шешім ұстаздардың наразылығын тудырып, олар өз құқықтарын сот арқылы қорғауға дайын екенін мәлімдеген еді.

Педагогтердің айтуынша, аттестаттау биыл алғаш рет электронды форматта өткен. Бірақ жаңа талаптар аттестаттау үдерісі басталып кеткеннен кейін енгізілген. Соның салдарынан көптеген мұғалімнің авторлық бағдарламасы “бекітілмеген” деген себеппен ұпайы есептелмей, нәтижесінде біліктілік санаты төмендетілген.