Жалақы азайды, ашу күшейді: Шығыс Қазақстанда 200-ге жуық мұғалім санатынан айырылды

Шығыс Қазақстан облысында 200-ге жуық “педагог-зерттеуші” санатындағы мұғалімнің біліктілік категориясы төмендетіліп, “педагог-эксперт” деңгейіне түсірілді. Бұл шешім ұстаздардың наразылығын тудырып, олар өз құқықтарын сот арқылы қорғауға дайын екенін мәлімдеді. Бұл жөнінде inbusiness.kz хабарлады.

Педагогтардың айтуынша, биыл аттестация электрондық форматта алғаш рет өткізілген. Процесс қаңтарда басталып, тамызда аяқталуы тиіс болған. Алайда жаңа ережелер 25 ақпанда қабылданып, 10 наурызда күшіне енген. Мұғалімдер бұл түзетулер аттестация басталып кеткеннен кейін енгізілгендіктен, шарттарды орындау мүмкін болмағанын айтады.

«Біз нәтижелерді үш ай бойы күттік. Қорытынды 1 қыркүйекке дейін шығуы керек еді, бірақ басқармадан бұйрық тек 19 қарашада келді. Сол кезде 200-дей мұғалімнің категориясы төмендетілгенін білдік», – деді мектеп мұғалімі Юлия Березка.

Педагогтардың сөзіне қарағанда, олардың көпшілігі өту балы – 113-тен жоғары нәтиже көрсеткен, бірақ бағалау парақтарында “авторлық бағдарлама Координациялық сараптамалық кеңестен өтпеген” деген түсініктеме жазылған.

«Бағалау парақтарын көруге рұқсат сұрадық, бірақ “Өрлеу” институты да, облыстық білім басқармасы да көрсетпеді. Кейін ресми сұрау салғаннан кейін кейбірімізге қолжетімді болды. Сол кезде көпшілігіміздің ұпайымыз жеткілікті екені анықталды. Бірақ жаңа талап – авторлық бағдарлама бекітілуі керек деген шарт енгізілген, ол уақыт жағынан орындалмайтын нәрсе», – дейді ұстаздар.

Мұғалімдердің айтуынша, авторлық бағдарламаны әзірлеу мен оны үш жыл бойы апробациядан өткізу уақыт талап ететін күрделі жұмыс, ал аттестация алдында бар-жоғы бірнеше ай ғана қалған.

Сонымен қатар мұғалімдер енді жалақысының азайғанымен қатар, үш ай бойы алған үстемақысын да кері қайтаруға міндетті болмақ.

«Педагог-зерттеуші мен педагог-эксперт арасындағы жалақы айырмасы ай сайын шамамен 30 мың теңге. Егер жылына есептесек, бір мұғалімнен 360 мың теңге үнемделеді. 200 ұстаз бойынша бұл 72 миллион теңге. Бәлкім, шенеуніктер бюджет үнемдеуді осылай шешкен шығар», – дейді педагогтар.

Олардың пікірінше, мұндай шешім білім беру сапасына да соққы болады.

«Бұл аттестацияны біз емес, білім басқармасы “құлатты”. Республика, халықаралық олимпиадалар жеңімпаздарын тәрбиелеген, оқу бағдарламаларының авторлары, тәжірибелі ұстаздар еңбегі бір белгімен жоққа шығарылды. Көпшілігі – 30 жылдан астам еңбек өтілі бар ардагер мұғалімдер», – деді Березка.

Облыстық білім басқармасы жағдайды түсіндіріп, әр педагогпен жеке кездесу өткізіп, бағалау парақтарымен таныстыратынын мәлімдеді.

«Былтыр авторлық бағдарлама дайындау талабы болған, бірақ ол бағалау жүйесіне кірмеген. Биыл министрлік жаңа өзгеріс енгізіп, бұл талап аттестация критерийлерінің біріне айналды. Егер педагог бір тармақты орындамаса, аттестациядан өте алмайды», – деді басқарманың мектепке дейінгі және орта білім бөлімінің басшысы Әсел Булжанова.

Қазіргі уақытта мұғалімдер әділеттілікті сот арқылы талап етуге дайын екенін айтып отыр.