Мұғалім тапшылығы: Англияда кейбір пән оқытылмауы мүмкін

Англия мектептерінде мұғалім жетіспеушілігі білім беру саласында үлкен дағдарысқа алып келіп отыр. Бұл жағдай сыныптардың толып кетуіне және біліктілігі төмен қызметкерлерді жұмысқа қабылдауға мәжбүрлеп жатыр.

Әсіресе, тұрмысы нашар отбасының балалары мен Оңтүстік Англиядағы мектептер мұғалім тапшылығының кесірінен ең көп зардап шегіп жатыр.

Мектептерде математика және жаратылыстану ғылымдары сияқты пәндер бойынша мұғалімдер жетіспейді. Соңғы деректер бойынша, испан тілі пәнін оқытып жүрген мұғалімдердің 49%-ы, информатикадан 60%-ы және физикадан 42%-ы бұл пәндер бойынша қажетті деңгейдегі біліктілікке ие емес.

Білім беру саласындағы сарапшы, Оксфорд университетінің профессоры Джон Хаусон кейбір мектепте физика сияқты пәндерді оқыту мүлде тоқтап қалуы мүмкін екенін ескертті. Бұл жағдай оқушылардың үздіксіз және сапалы білім алуына үлкен кедергі келтіріп, олардың жоғары оқу орындарына түсу мүмкіндіктеріне кері әсер етуі ықтимал.

Ұлыбританияның білім министрлігі бұл дағдарысты мойындап, мұғалімдерді тарту үшін бірқатар шара қолға алынғанын мәлімдеді. Дегенмен жоғары жалақысы бар басқа салалармен бәсекелестік және халықаралық деңгейде оқыту мүмкіндіктерінің тартымдылығы жағдайды шиеленістіріп отыр.