Министрлік ҰБТ-дағы қабылданбаған апелляцияға түсініктеме берді

Ұлттық бірыңғай тестілеу (ҰБТ) кезінде дауға ұласқан апелляциялық өтінішке қатысты Ғылым және жоғары білім министрлігі түсініктеме берді. Бұл – 139 балл жинаған оқушының апелляциясы. Ұлттық тестілеу орталығы (ҰТО) талапкердің таңдаған жауабын қате деп танып, қабылдамаған. Ал талапкер мұнымен келіспейтінін айтып, дәлелдер келтірді.

Осы оқиға бойынша Juz40 онлайн курсының негізін қалаушы Жұлдызай Мұсаева әлеуметтік желіде жазба жариялап, оқушының жауабы бірнеше филолог маманның сараптамасынан өткенін айтты. Оның мәліметінше, ҰТО бұл сұрақты 10 шақты филологпен талқылап, бірақ олардың ешқайсысы оқушының жауабын таңдамағанын алға тартқан.

«Бірақ біз де бірнеше филолог маманмен сараптама өткіздік», – деді Жұлдызай Мұсаева.

Жазбада сонымен қатар ҰТО-ның апелляция шешімі заңды түрде хаттама ретінде алдын ала берілмегені айтылған. Протокол талапкерге 22 шілде күні ғана қолмен берілген. Осыған байланысты Мұсаева апелляция жауаптары барлық оқушыға дер кезінде, ресми түрде жолдануы қажет екенін айтты.

Мәселеге байланысты Ғылым және жоғары білім вице-министрі Гүлзат Көбенова Qrnews тілшісіне түсініктеме беріп, ҰБТ сұрақтарының қате болу мүмкіндігін жоққа шығарды.

«Сұрақта қате болуы мүмкін емес. ҰБТ-ның әрбір сұрағын ғалымдардан құралған арнайы топ құрастырады. Содан кейін ол сұрақтар үш мәрте сараптамадан өтеді. Бірден ҰБТ-ға жіберілмейді», – деді вице-министр.

Жұлдызай Мұсаева бұл мәселе келер жылы қайталанбауы тиіс екенін айтып, күмәнді, шатастыратын сұрақтардың ҰБТ-да болмауын талап етті. Пост әлеуметтік желіде кең тарап, оқушылар мен ата-аналар қолдау білдіріп жатыр.