Мектептегі ЖИ: 2026 жылы бізді қандай өзгерістер күтіп тұр?

Қазақстанның білім беру жүйесіне үлкен «апгрейд» дайындалып жатыр - жасанды интеллект  ресми түрде оқу процесінің бір бөлігіне айналады. 2026 жылдан бастап елімізде бірнеше ірі жоба іске қосылмақ, деп хабарлайды Үкіметтің баспасөз қызметі

Жаңа реформа аясында жаңа буынның цифрлық мектебі — Qazaq Digital Mektebi ашылып, мұғалімдерге көмекші болатын ЖИ негізіндегі ұлттық білім беру платформасы жасақталады. Сонымен қатар барлық электронды күнделіктер мен журналдардың басын қосатын бірыңғай деректер базасы құрылмақ. Ең қызығы, педагогтарды қағазбастылықтан құтқару үшін арнайы ЖИ-агенттер есеп беруге көмектессе, шағын жинақты мектептерде ЖИ-репетиторлар (2026–2027 оқу жылынан бастап) пилоттық режимде жұмыс істей бастайды.

Бұл технологияларды меңгеру үшін 2026 жылы 200 мыңнан астам мұғалім ЖИ-мен жұмыс істеу дағдыларын үйренеді. Сонымен қатар оқушылардың да ЖИ-сауаттылығын арттыруға басымдық берілмек. Барлық мәліметтер QazTech мемлекеттік бұлтты платформасында біріктіріледі. 2026 жылдың бірінші жартысында арнайы жұмыс тобы заңнамаға өзгерістер енгізіп, жобалардың тиімділігін бағалайды. Реформаның басты мақсаты - мұғалімдерді рутинадан босатып, бар назарды бала тәрбиесі мен сапалы білімге аудару.