Мектептегі факультативтер мұғалімдердің қалтасын қампайту үшін қажет пе?

Мектептерде факультатив сабақтардың міндетті болуы қоғамда қызу талқыға түсті. Кейбір ата-ана балаларын өздері қалаған оқу бағытында емес, міндеттелген факультативтерге қатысуға мәжбүрлеу мектептердің мұғалімдердің сағатын толтырып, табысын арттыруға бағытталғанын алға тартады.

Оқу-ағарту министрі Ғани Бейсембаев факультативтердің міндеттілігі туралы пікір білдіріп, олардың оқушылардың оқу жүктемесіне сәйкес енгізілетінін және әрбір факультативтің мектеп әкімшілігімен бекітілген оқу жоспарында көрсетілгенін айтты. Министрдің сөзінше, бұл сабақтар балалардың білімін тереңдетуге бағытталған.

Дегенмен мәжіліс депутаты Ирина Смирнова мектептегі факультативтік сағаттардың мұғалімдердің жалақысын арттыру құралына айналмауы керектігін атап өтті.

"Мектеп – білім беру орны, ал мұғалімдер балаларды оқыту үшін жұмыс істейді. Оқушылар факультативке тек сағат толтыру үшін қатысуға міндетті емес", – деді ол.

Депутат ата-аналарға мектептің оқу жоспарын, қамқоршылық кеңестің шешімдерін және педагогикалық кеңестің қаулыларын қарап шығуға кеңес берді. Осы құжаттарға сүйене отырып, ата-аналар мектеп директорына өтініш жазып, балаларының міндетті емес факультативтерден босатылуын талап ете алады.