Мектептегі әскери дайындық 1 қыркүйектен бастап өзгереді

Қазақстан мектептері мен колледждерінде 1 қыркүйектен бастап алғашқы әскери дайындық (АӘД) пәні жаңа форматта оқытыла бастайды. Бұл туралы Мәжілістің Халықаралық істер, қорғаныс және қауіпсіздік комитеті мәлімдеді.

Бұған дейін қолданыста болған АЖТД (алғашқы әскери және технологиялық дайындық) атауының орнына бұрынғы таныс «АӘД» (алғашқы әскери дайындық) атауы қайтарылды. Енді оқушылар тек технологиялық элементтермен шектелмей, толыққанды әскери білім алатын болады. Оқу бағдарламасы қайта жазылып, жаңа оқулықтар әзірленуде.

Жаңа заң жобасы бойынша енді бұл пәннен кез келген ұстаз сабақ бере алмайды. Басты талап - оқытушының әскери қызметке тікелей қатысы болуы тиіс.

«Көптеген мұғалімдер әскери қызметте болмаған, студенттік партадан бірден мектепке келген. Енді мұғалім не мерзімді әскери қызметті өткерген, не әскери кафедраны бітіріп, шен алған маман болуы шарт», - дейді комитеттің бас кеңесшісі Арман Құлмағамбетов.

Мұғалімдердің біліктілігін арттыру енді әскери оқу орындары мен жоғары оқу орындары жанындағы әскери кафедраларда тегін жүргізіледі. 15 жылдан астам қызмет еткен әскери қызметшілер де запасқа шыққан соң мектепте сабақ беруге құқылы. Сонымен қатар, біліктілікті арттыру жүйесі мұғалімдердің категориясына, тиісінше жалақысының өсуіне тікелей әсер ететін болады.

Еліміздің барлық өңірлерінде дайындығы тереңдетілген мамандандырылған әскери мектеп-интернаттар ашылады.Еліміз бойынша қосымша 16 әскери мектеп (11 қалалық, 5 ауылдық) ашу жоспарланған.

• «Жас ұлан» мектептері әскери колледждерге айналды.

• Мектеп жанынан әскери-патриоттық үйірмелер ашуға мүмкіндік берілді.

Ең бастысы, мұндай мамандандырылған мектептердің түлектері мен «Жас сарбаз» қозғалысының мүшелері әскери жоғары оқу орындарына түсу кезінде артықшылықтарға ие болады.