Мектепте заңсыз ақша жинаса, қайда хабарласу керек?

Білім беру саласында жемқорлықтың алдын алу мақсатында екі мыңнан астам білім беру ұйымдарының басшылары мен аумақтық департамент өкілдерінің қатысуымен арнайы кеңес өтті. Кеңес барысында жемқорлыққа қарсы іс-қимыл, бақылау шараларын ұйымдастыру және заңсыз ақша жинаудың алдын алу туралы жан-жақты түсініктемелер берілді. Бұл туралы Оқу-ағарту министрлігі хабарлады.

ҚР «Педагог мәртебесі туралы» Заңына сәйкес, мұғалімдерді кәсіби қызметіне қатысы жоқ жұмыстарға тартуға және оларға тауарлар мен қызметтерді сатып алуды міндеттеуге тыйым салынатыны атап өтілді. Бұл талаптарды бұзған жағдайда, заңнама шеңберінде жауапкершілікке тарту қарастырылған.

Комитет төрағасы Ернұр Дәуенов барлық білім беру ұйымдарының қызметкерлерін сыбайлас жемқорлықтың алдын алуға және кез келген құқықбұзушылықтар туралы хабарлауға шақырды. Егер мектептерде заңсыз ақша жинау немесе сыбайлас жемқорлықтың басқа да көріністері анықталса, ҚР Оқу-ағарту министрлігінің Білім беру саласындағы сапаны қамтамасыз ету комитетіне немесе аумақтық департаменттерге хабарласуға болады. Байланыс нөмірі: +7 (7172) 74-23-92.

Бұл шаралар сыбайлас жемқорлықтың алдын алу мақсатында ҚР Оқу-ағарту министрлігі мен Сыбайлас жемқорлыққа қарсы іс-қимыл агенттігі бірлесіп іске асырып жатқан «Жол картасы» аясында жүзеге асырылады. Осы бастаманың нәтижесінде мемлекетке 15 миллиард теңге қайтарылды.

Жемқорлыққа қарсы шаралар одан әрі жалғасады.