Мектепте хиджаб киюге бола ма: Оқу-ағарту министрлігі талапты түсіндірді

Қазақстан мектептерінде оқу ғимараты ішінде бас киім киюге жол берілмейді. Оқу-ағарту министрлігі жаңа оқу жылы қарсаңында міндетті мектеп формасына қойылатын талаптарды түсіндірді.

Ведомство мәліметінше, Қазақстан Конституциясына сәйкес дін мемлекеттен бөлек, ал білім беру ұйымдарындағы білім мен тәрбие беру жүйесі зайырлы сипатқа ие. Мектеп формасының үлгісін білім беру ұйымы қамқоршылық кеңесі, ата-аналар комитеті және оқушылардың өзін-өзі басқару органдарының қатысуымен анықтайды. Қабылданған үлгі жалпы мектептік ата-аналар жиналысының хаттамасымен бекітіледі.

Қауіпсіздік талаптарына сәйкес мектеп формасында оқушыға жарақат келтіруі мүмкін бөлшектер мен әшекейлер болмауы керек. Сондай-ақ білім беру ұйымдарының жарғыларында белгіленген қағидаларға сәйкес мектеп ғимаратының ішінде бас киім киюге рұқсат етілмейді.

Ата-аналар мектеп формасын кез келген сауда орнынан сатып алып, өндірушіні өздері таңдай алады. Мектеп әкімшілігінің белгілі бір өндірушінің киімін сатып алуды талап етуіне немесе оған артықшылық беруіне жол берілмейді.

Биыл әлеуметтік жағынан осал отбасылардан шыққан 450 мыңға жуық балаға мектеп формасы, аяқ киім және оқу құралдарын сатып алуға көмек көрсету жоспарланған. Осы мақсатқа жергілікті бюджеттерден шамамен 23 млрд теңге қарастырылған.

«Білім туралы» заңға сәйкес ата-аналар білім беру ұйымының жарғысында бекітілген қағидалар мен міндетті мектеп формасына қойылатын талаптарды сақтауға міндетті.