Мектепте бомба бар: Елімізде бұлай әзілдегендер қалай жазаланады?

Соңғы кездері елімізде мектепте бомба қойылғанын немесе өзі мектепте атыс шығаратынын айтып әзілдейтіндер көбейіп кетті.

Жыл басында, 25 қаңтарда әлдекім Ақтөбе мектептерінде жаппай атыс ұйымдастыратыны жайлы жалған хабар таратқан. Осыған байланысты 50 мыңға жуық оқуышы сабаққа бармаған. Жақында Астана мектептерінде жаппай атыс болатыны жайлы тағы да жалған хабар тарады. Бұдан бөлек, 8 сәуірде СДУ унивеситетінде бомба қойылғаны туралы хабар тарап, кейін жалған екені мәлім болды. 

Ішкі істер министрлігінің мәліметінше, биыл Астана, Ақтөбе, Атырау, Алматы, Павлодар, Қарағанды және Қостанай қалаларында осындай хабарламалар тараған.

Мұндай оқиғалар халықты жаппай эвакуациялауға және қоғамдық тәртіптің айтарлықтай бұзылуына әкеп соқтырады. Сондықтан жазасы да қатаң болады.

Кейбір елдерде, мысалы, АҚШ-та іс федералды сотқа жетсе, бомба қойылғаны туралы жалған ақпарат үшін 10 жылға дейін бас бостандығынан айыруы мүмкін. Ал елімізде бұлай әзілдеудің құны қанша?

Қылмыстық кодекстің 273-бабында мұндай қылмыс үшін 5000 АЕК-ке дейін (2024 жылы 18 млн теңгеден астам) айыппұл салу немесе бес жылға дейін бас бостандығынан айыру жазасы қарастырылған. Сонымен қатар нысанға келтірілген залалды өтеу керек болады. Бұл сома бір нысан үшін 200 мыңнан 2 миллион теңгеге дейін жетуі мүмкін.

Айта кетейік, бұндай қылмыс үшін қылмыстық жауапкершілік 14 жастан басталады.