Мектеп оқушыларына қоңырау шалатын алаяқтар пайда болды – министрлік ескертті

ҚР Оқу-ағарту министрлігінің Балалардың құқықтарын қорғау комитеті ата-аналарды жаңа алаяқтық тәсілдерден сақ болуға шақырды.

Жаңа оқу жылы басталғалы бері алаяқтар мектеп оқушыларына хабарласып, өзін мұғаліммін деп таныстырып жатыр. Олар «электрондық күнделікті жаңарту» деген сылтаумен SMS арқылы келген бір реттік құпия кодтарды сұрайды. Балалар мұны ата-анасына немесе мектепке көмектесіп жатырмын деп ойлауы мүмкін. Алайда іс жүзінде алаяқтар осы кодтарды пайдаланып, «Электрондық үкімет» жүйесіне, онлайн-банкингке немесе туыстарының шоттарына қол жеткізеді.

Комитет ата-аналарға балаларымен әңгімелесіп, мұндай жағдайлардың қауіптілігін түсіндіруді ұсынады.
Есте сақтау қажет басты қағидалар:
– SMS-тегі құпия кодтарды ешкімге бермеу;
– өзін мұғаліммін деген адам хабарласса да, бірден ата-анаға қоңырау шалу;
– күдікті сілтемелерге өтпеу және белгісіз қосымшаларды жүктемеу.

Мамандардың айтуынша, шынайы мұғалімдер де, мектеп қызметкерлері де ешқашан SMS кодтарын немесе банк картасының деректерін сұрамайды. Ата-аналар телефонға бақылау орнатып, бейтаныс нөмірлерден келетін қоңырауларды қадағалауы қажет. Ең бастысы – бала өз ойын ашық айта алатындай сенімді қарым-қатынас орнату.

Күдікті әрекеттер байқалған жағдайда құқық қорғау органдарына немесе 111 Байланыс орталығына хабарласуға болады.

Министрлік балалардың қауіпсіздігі ең алдымен ата-аналардың қырағылығына байланысты екенін еске салады.