Мектеп бітіру кешіне ақша жинауға қатаң тыйым салынады – Оқу-ағарту министрлігі

Қазақстанда мектеп бітіру кештеріне ақша жинауға қатаң тыйым салынады, деп хабарлады Оқу-ағарту министрлігі. Бұл талап министрлік пен Ішкі істер министрлігінің бірлескен шешімі аясында енгізіледі.

Ведомство мәліметінше, аттестат табыстау рәсімі тек білім беру ұйымдарының ғимараттарында өткізілуі тиіс. Сондай-ақ бітіру кештерін мектептен тыс жерде ұйымдастыруға жол берілмейді.

Қабылданған шаралар оқушылардың қауіпсіздігін қамтамасыз етуге, олардың құқықтарын қорғауға және құқық бұзушылықтардың алдын алуға бағытталған. Осыған байланысты оқушылардан, ата-аналардан немесе заңды өкілдерден қаражат және өзге де материалдық құндылықтар жинауға тыйым салынған.

Жергілікті атқарушы органдарға қаржылық шығынсыз тәрбиелік және мәдени-ағартушылық іс-шаралар ұйымдастыру тапсырылды. Ал ішкі істер органдары қоғамдық тәртіпті сақтау мен оқушылардың қауіпсіздігін қамтамасыз ету бойынша бақылауды күшейтеді.