Маңғыстаудағы мектеп оқушыларының жаппай улануы: алты қызметкерден стафилококк анықталды

7-13 қыркүйек аралығында Маңғыстау облысы Мұнайлы ауданындағы Бесшоқы елді мекенінде орналасқан №8 жалпы білім беру мектебінде оқушылар жаппай тамақтан уланып қалды. Маңғыстау облысының санитарлық-эпидемиологиялық бақылау департаментінің баспасөз қызметінің хабарлауынша, бұл оқиға бойынша Ұлттық сараптама орталығының мамандары жоспардан тыс эпидемиологиялық тексеріс жүргізді. Бұл туралы Lada.kz хабарлады.

Тексеріс барысында көптеген санитарлық норма бұзылғаны анықталды. Лабораториялық зерттеулер дайын тағамдарда, мысалы, картоп пюресі, тауық котлеті, тұздық және компотта патогенді бактериялар бар екенін көрсетті.

Мектеп асханасының алты қызметкерінен, соның ішінде бір медицина қызметкері мен жеке кәсіпкерден стафилококк анықтады. Асханада ыдыс жуушы және тамақ таратушы болып жұмыс істеген қызметкер бактериалды дизентерияның тасымалдаушысы болып, тамақ өнімдерін ластап отырғаны анықталды.

Сонымен қатар асхана қызметкерлерінің төртеуі жалған медициналық тексерістен өткені белгілі болды, бұл жағдай прокуратура мен облыстық ішкі істер департаментіне жіберілді. Қазіргі уақытта санитарлық нормаларды бұзу фактісі бойынша қылмыстық іс қозғалып, сотқа дейінгі тергеу жүріп жатыр.

Осы факторлар мектеп оқушылары арасында ішек инфекциясының таралуына себеп болған.