Қыркүйектен бастап студенттердің стипендиясы тағы өседі

Бүгін, 30 маусымда Мәжіліс төрағасы Ерлан Қошанов сегізінші сайланған Қазақстан Республикасы Парламентінің үшінші сессиясының жұмысын қорытындылады. Ол өз баяндамасында жаңа оқу жылынан бастап студенттерге төленетін стипендия мөлшері тағы артатынын мәлімдеді. 

«Қыркүйек айынан бастап стипендия мөлшерін тағы көтеру жоспарланып отыр. Кейінгі бес жылда стипендия екі есе дерлік өскенін атап өткен жөн. Оған қоса, ғылыми атақ үшін де үстеме ақы қарастырылды», – деді Ерлан Қошанов. 

Ғылым және жоғары білім вице-министрі Талғат Ешенқұловтың айтуынша, 2025 жылғы 1 қыркүйектен бастап еліміздегі колледж және жоғары оқу орны студенттеріне төленетін мемлекеттік шәкіртақы тағы да өседі. Атап айтқанда, бакалавриатта оқитын студенттердің шәкіртақысы 52 372 теңге, магистратурада – 117 098 теңге, докторантурада – 262 500 теңге болады. Осылайша 2020 жылмен салыстырғанда бакалавриаттағы шәкіртақы көлемі 2 есе, ал магистратура мен докторантурада 1,75 есе артады деп жоспарланып отыр. 

Сонымен қатар 2023 жылдан бастап білім және ғылым саласында ғылыми дәрежесі бар мамандарға үстемеақы төлеу жүйесі енгізілді. Мысалы, ғылыми атағы бар ғылыми қызметкерлер үшін үстемеақы мөлшері айтарлықтай өсіп отыр: қауымдастырылған профессор ғылыми дәрежесі (PhD немесе ғылым кандидаты) бар маманға 25 еселенген АЕК, ал профессор ғылыми атағы бар қызметкерге 50 еселенген АЕК көлемінде қосымша төлем белгіленген (бұрын сәйкесінше 17 және 34 АЕК болған).