Курстарға ақша жұмсамайсыз: Gemini қазақстандық студенттерге шетелге түсуге көмектеседі

Google Gemini жасанды интеллекті шетелдік жоғары оқу орындарына түсуге қажетті халықаралық SAT емтиханына тегін дайындалу мүмкіндігін іске қосты. Бұл қазақстандық студенттерге қымбат курстарға ақша үнемдеп, сапалы білім алуға жол ашады, деп хабарлайды finratings.kz.

SAT дегеніміз не?

SAT (Scholastic Assessment Test) - негізінен АҚШ университеттеріне түсу үшін қажетті халықаралық стандартталған емтихан. Мағынасы жағынан бұл - ҰБТ-ның шетелдік баламасы, бірақ мұнда сыни ойлау дағдыларына, математика мен ағылшын тіліне басымдық беріледі.

Енді Gemini қосымшасының қолданушылары толық форматты SAT тесттерін тегін тапсыра алады. Бұл тесттер нақты емтихан форматына барынша жақындатылған.

Тесттен өткен соң Gemini:

• Нәтижелерді көрсетіп, лезде кері байланыс береді;
• Студенттің мықты және әлсіз тұстарын анықтайды;
• Әрбір дұрыс жауаптың логикасын түсіндіреді;
• Жеке дайындық жоспарын құруға көмектеседі.

Қазақстандық студенттер үшін маңыздылығы

Шетелде оқуды жоспарлайтындар үшін SAT сертификаты міндетті талаптардың бірі. Сондай-ақ, бұл емтихан Назарбаев Университетіне түсу үшін де қажет.

Қазақстанда жеке репетиторлардың бағасы сағатына 4 000 – 10 000 теңгеден басталады. Gemini бұл шығындарды қысқартып, үйден шықпай-ақ дайындалуға мүмкіндік береді.

SAT сертификатының нәтижелерін ҰБТ жүйесінде ескеруге болады: сертификат балдарын Ұлттық бірыңғай тестілеу балдарына ауыстыру мүмкіндігі қарастырылған.