Колледждерге мемлекет тапсырысының көлемі артты

Жаңа оқу жылында техникалық және кәсіптік білім беру ұйымдарындағы мемлекеттік білім беру тапсырысының көлемі 60 мың орынға артпақ. Осылайша, мемлекет тапсырысы бойынша білім алушылар саны 145 мыңға жетеді. Бұл туралы Оқу-ағарту министрлігінің баспасөз қызметі хабарлады.

«Мемлекет басшысының тапсырмасы бойынша сұранысқа ие мамандықтар бойынша тегін техникалық және кәсіптік білім беру бойынша мемлекеттік білім беру тапсырысы республикалық бюджеттен 60 мың орынға ұлғайтылды. 2025 жылға дейін ТжКБ студенттері мемлекеттік тапсырыспен 100% қамтамасыз етіледі», - дейді техникалық және кәсіптік білім департаментінің бас сарапшысы Дархан Сатанов.

Мемлекеттік білім беру тапсырысы техникалық мамандықтар бойынша ұлғаяды: геология, машина жасау, энергетика, IT, металлургия, көлік және т.б. Бүгінгі таңда ТжКБ-да мемлекеттік тапсырыспен қамту 80%-ға жеткен.