Кітап оқу адамға не береді?

Абай хакім: "Адамның ғылымы, білімі, хақиқатқа, растыққа құмарлық болып, әр нәрсенің түбін, хикметін білмекке ынтық бірлән табылады ",- деген екен. Яғни «білімге, хақиқатқа, растыққа құмарлық болуы» үшін ең алдымен кітап оқу өнерін игерген жөн дер едім. Өйткені, барлық білім – кітапта.

Дана халқымыз: «Кітап - білім бұлағы, білім - өмір шырағы» деп  бекер айтпаған ғой. Себебі кітап білім мен таным көкжиегін кеңейтеді.  Кітап арқылы біз әлемді, тарихты, ғылымды, өнерді, мәдениетті танимыз. Әрбір кітап — жаңа әлем, жаңа ой. Ол сөздік қор мен тіл байлығын арттырады. Кітап оқыған сайын жаңа сөздерді, сөйлеу мәнерін үйреніп, өз ойын нақты әрі әсерлі жеткізе алатын боласың.

Кітап — логикалық ойлауға, себеп-салдар байланысын көруге, талдауға, салыстыруға үйретеді. Әсіресе ғылыми, философиялық, көркем әдебиет — миды «жаттықтырады».
Көркем әдебиет кейіпкерлердің өмірін сезінуге, өзгелердің орнына өзіңді қойып көруге, жан дүниеңді тереңдетуге көмектеседі.

Жақсы кітап адамды шабыттандырады. Автордың сөзбен салған бейнелері арқылы оқырманның қиялы кеңейеді, ішкі суреткерлік қасиеті ашылады.

Кітап оқу — гаджеттер мен әлеуметтік желілерге кеткен уақытты пайдалы іспен алмастырудың ең жақсы жолы.
Байқап отырсақ, кітапті оқу назарды бір нәрсеге ұзақ уақыт аударып, терең ойлануға үйретеді. Бұл — қазіргі заманда аса маңызды дағды. Өзін-өзі дамыту мен мотивация көзі. Көптеген кітаптар адамға өмірлік бағыт береді, мақсат қоюға, қиындықтан шығуға, сенімді арттыруға көмектеседі.

Кітап — адам жанын байытатын, ойды тереңдететін, тілді ұштайтын, тұлға ретінде дамытатын ең сенімді серік. Оны ұдайы әрі жүйелі оқыған адам  озық ойлы, терең білімді, жан-жақты тұлға болары анық. Сондықтан кітапты жақын дос етейік.

Дариға Тортаева