Кибербуллингке қарсы соққы: Еліміздің мектептерінде жаңа заң сабақтары басталды

Бүгіннен бастап еліміздің 1000-ға жуық мектебі мен колледжінде жасөспірімдер арасындағы қылмыс пен буллингті түп-тамырымен жоюға бағытталған ауқымды жоба іске қосылды. «Заң және тәртіп» атты бұл бастама оқушылардың құқықтық сауатын ашып қана қоймай, оларды жауапкершілікке үйретпек, деп хабарлайды ҚР Оқу-ағарту министрлігі.

Тәжірибе нәтижесі: Буллинг 18%-ға азайды.

Бұл жоба республика деңгейіне шықпас бұрын Алматы облысының Талғар ауданында сынақтан өткен болатын. Нәтиже таңғалдырды:

• Буллинг пен кибербуллинг деңгейі бірден 18%-ға төмендеген;

• Тәртібінде ауытқуы бар жасөспірімдер саны 30%-ға азайған;

• Оқушылардың заңға бағыну көрсеткіші 31,9%-ға өскен.

Оқушыларға теорияны айтып қана қоймай, өмірлік тәжірибесімен бөлісу үшін құқық қорғау органдарында қызмет еткен 600-ден астам тәжірибелі наставник тартылды. Олар жасөспірімдерге заң алдындағы жауапкершіліктің салмағын шынайы мысалдармен түсіндіреді.

Сабақтар әр екі апта сайын өтіп тұрады. Қазіргі таңда бұл жобамен Шымкентте 100-ге жуық, Қарағанды облысында 190-нан астам, ал Павлодар өңірінде 110 білім ордасы қамтылып отыр.

Оқу-ағарту министрлігі бұл қадамның тек мектеп ішінде ғана емес, цифрлық кеңістікте де (интернетте) балалардың қауіпсіздігін қамтамасыз ететініне сенімді. Бұл бастама алдағы уақытта «Қазақстан балалары» тұжырымдамасы аясында еліміздің барлық өңіріне жаппай енгізілмек.