КБТУ-да көрнекті қайраткер Әділ Ахметовтың 85 жылдығына арналған дөңгелек үстел өтті

Қазақстан-Британ техникалық университетінің (КБТУ) қабырғасында «Киелі орда КБТУ: игі дәстүрлер мен жаңару жолдары» атты салтанатты дөңгелек үстел өтті. Шара көрнекті мемлекет және қоғам қайраткері, филология ғылымдарының докторы, профессор, дипломат әрі КБТУ-дың тұңғыш ректоры Әділ Құрманжанұлы Ахметовтың 85 жылдық мерейтойына арналды.

Жиынға академиялық қауымдастық өкілдері, белгілі ғалымдар, университет түлектері мен студенттер қатысты. Басқосудың басты мақсаты - мерейтой иесінің отандық ғылым мен білім беру саласын дамытуға, атап айтқанда, КБТУ-дың іргетасын қалап, халықаралық деңгейге көтеруге қосқан өлшеусіз үлесін ұлықтау.

Бағдарлама аясында академиктің ғылыми еңбектеріне терең талдау жасалды. Әсіресе, оның түркітану саласындағы бірегей еңбегі — «Колумб дәуірінен бұрынғы Америкалық үндістердің Алтайлық тегі» атты зерттеуі қатысушылардың ерекше қызығушылығын тудырды.

Ғылым мен білімді ұштастырудағы ерен еңбегі үшін Әділ Ахметовке «КБТУ-дың Құрметті профессоры» атағы салтанатты түрде берілді. Академиктің көпжылдық ғылыми мұрасының жаңа басылымдары таныстырылды. Студенттер мен жас ғалымдар мерейтой иесімен тікелей тілдесіп, өнегелі әңгіме өрбіді.

Кездесудің ең әсерлі сәті - КБТУ оқу ғимаратында Әділ Ахметов атындағы дәрісхананың ашылу салтанаты болды. Бұл бастама — білім ордасының негізін қалаушы тұлғаға көрсетілген жоғары құрмет пен кейінгі ұрпақ үшін қалдырылған мәңгілік тағылым.

«Біз осындай ұлы тұлғамен мақтанамыз. Терең тарихы бар білім ордасында Әділ Құрманжанұлы салған сара жолмен студенттеріміздің білім алып жатқаны - біз үшін үлкен мәртебе», - деп атап өтті университет басшылығы.

Шара соңында қонақтар университеттің тарихи ғимаратына экскурсия жасап, естелік суретке түсті.