Қазақстандықтар ЖИ және атом энергетикасы салалары бойынша шетелде грантпен оқи алады

Биыл халықаралық стипендияларды тағайындау конкурсы жаңа ережелер бойынша өтті.

Мемлекеттік кеңесші Ерлан Қариннің төрағалығымен өткен Шетелде кадрлар даярлау жөніндегі республикалық комиссияның кезекті отырысында «Болашақ» бағдарламасы аясында атом энергетикасы және жасанды интеллект (ЖИ) мамандары оқи алатыны белгілі болды. Бұл туралы Ақорданың баспасөз қызметі хабарлады.

Биылғы конкурс айтарлықтай өзгерістермен өтті. Жаңа ережелерге сәйкес, іріктеу үш кезеңнен тұрып, үміткерлерге жыл ішінде бағын қайта сынауға мүмкіндік берілді. Бәсекелестік жоғары болып, бір орынға орта есеппен төрт адамнан келді. Нәтижесінде, комиссия шешімімен 225 қазақстандық халықаралық стипендияның иегері атанды.
 
Мемлекеттің стратегиялық басымдықтарына сәйкес, бағдарламаға жаңа мамандықтар санаттары қосылуда. Соның ішінде, 2026 жылдан бастап «Жасанды интеллект жүйесін пайдаланушылар» атты жаңа санат бойынша кәсіби тағылымдамалар ұйымдастырылатын болды. Бұл қадам ұлттық экономиканы жаппай цифрландыру жағдайында елдің бәсекеге қабілеттілігін арттыруға бағытталған.
 
Сонымен қатар  атом энергетикасы саласына ерекше көңіл бөлінбек. 2026 жылдан бастап бұл саланың мамандары үшін магистратура, докторантура және тағылымдама бағдарламаларын қамтитын жеке санат құрылады. Аталған бағыт бойынша жыл сайын 20 стипендия бөлу туралы квота бекітілді.

Жиын соңында Ерлан Қарин «Болашақ» стипендиясын одан әрі жетілдіру және ел экономикасына қажетті жоғары білікті кадрларды даярлау сапасын арттыру бойынша тиісті органдарға нақты тапсырмалар берді.