Қазақстандық жас химиктер Менделеев олимпиадасында топ жарды

2025 жылғы 4–12 мамыр аралығында Бразилияның Белу-Оризонти қаласында өткен 59-шы Халықаралық Менделеев олимпиадасында Қазақстан оқушылары зор жетістікке қол жеткізді. 40 елден келген 240-қа жуық қатысушының арасында отандық команда 100% нәтиже көрсетіп, барлығы 11 медаль жеңіп алды.

Олимпиадаға еліміздің түкпір-түкпіріндегі республикалық химия олимпиадасының жеңімпаздары қатысып, АҚШ, Жапония, Қытай және Еуропаның алдыңғы қатарлы құрамаларын басып озды. Қазақстан құрамасы білім сапасының жоғары екенін дәлелдеп, әлемдік аренада тағы бір мәрте абырой биігінен көрінді.

Маңғыстау облысындағы «Білім-Инновация» лицейінің 10-сынып оқушысы Меңдіғали Қалдыбай практикалық кезеңде ең жоғары ұпай жинап, «Award for the Best Score in the Practical Exam» арнайы сыйлығына ие болды.

Күміс медаль иегерлері: – Данияр Базарбай – 11 сынып, «Білім-Инновация» лицейі, Ақтөбе облысы; – Меңдіғали Қалдыбай – 10 сынып, «Білім-Инновация» лицейі, Маңғыстау облысы; – Аңсар Жақсылықов – 11 сынып, «Білім-Инновация» лицейі, Ақтөбе облысы; – Арен Теңізбаев – 10 сынып, №9 «Білім-Инновация» лицейі, Қызылорда облысы; – Санжар Қалиақбар – 11 сынып, «Білім-Инновация» лицейі, Қарағанды облысы; – Қали Әбілмансұр – 10 сынып, Назарбаев зияткерлік мектебі, Астана қаласы; – Райымбек Ғабдолла – 11 сынып, «Білім-Инновация» лицейі, Маңғыстау облысы.

Қола медаль иегерлері: – Айзере Жеңісханова – 10 сынып, Назарбаев зияткерлік мектебі, Өскемен қаласы; – Нұрқожа Умарбаев – 11 сынып, «Білім-Инновация» лицейі, Маңғыстау облысы; – Ярослава Кравчук – 11 сынып, №8 дарынды балаларға арналған мектеп-лицейі, Павлодар қаласы; – Алихан Серікұлы – 11 сынып, «Haileybury Almaty» мектебі, Алматы қаласы.

Команда жетекшілері – Бахытжан Елдана мен Азим Аманжолов.

Айта кетейік, Халықаралық Менделеев олимпиадасы Қазақстан ұлттық құрамасы үшін 2025 жылдың 5-14 шілдесінде Біріккен Араб Әмірліктерінде өтетін химиядан Халықаралық олимпиадаға (IChO) дайындықтың маңызды кезеңі болып саналады.