Қазақстандық ұстаздар Халықаралық педагогикалық фестивальде жүлделі орындарды иеленді

Ереванда өткен VIII мұғалімдер мен білім беру қызметкерлерінің съезі аясында ұйымдастырылған ІІІ Халықаралық педагогикалық шеберлік фестивалінде қазақстандық ұстаздар жоғары нәтижелерге қол жеткізді. Фестивальге Қазақстан, Армения, Беларусь, Қырғызстан және Ресейден барлығы 56 педагог қатысты.

Фестивальдің басты мақсаты – ТМД елдерінен ең үздік педагогтерді анықтап, олардың тәжірибелерін мемлекеттер арасында тарату, сондай-ақ жаһандану жағдайында білім берудің құндылықтары мен басымдықтарын айқындау. Фестивальдің пленарлық және секциялық отырыстарында қатысушылар білім беру саласын дамытудағы өзекті мәселелерді, білім сапасын бағалаудың жаңа талаптарын және заманауи педагогикалық тенденцияларды талқылады.

Байқау үш негізгі номинация бойынша өтті: «Мұғалім», «Тәрбиеші» және «Психолог/Әлеуметтік педагог». Қазақстаннан өңірлік және республикалық деңгейдегі іріктеу кезеңдерінен өткен 6 үздік педагог өз шеберліктерін сынады.

Қатысушылар өздерінің авторлық әдістемелерін, оқу жоспарларын және педагогикалық технологияларын таныстырып, шеберлік сыныптарын өткізді.

Нәтижесінде Түркістан қаласындағы Назарбаев Зияткерлік мектебінің педагог-психологы Жанна Арынбаева екінші орынды иеленді. Ал Ақмола облысындағы Н.Крупская атындағы мектептің психологы Аслан Манатов пен Алматы қаласындағы РФММ-нің информатика пәнінің мұғалімі Гүлнұр Аубакирова үшінші орынға ие болды.

Съезд ТМД елдерінің педагогтеріне тәжірибе алмасып, кәсіби байланыс орнатуға мүмкіндік беретін маңызды алаңға айналды.