Қазақстандық оқушылар Грекиядағы халықаралық робототехника чемпионатында екінші орын иеленді

Түркістан облысы Қазығұрт ауылынан барған «Qazygurt» командасы Грекияда өткен «Open International Championship 2026» халықаралық робототехника чемпионатында жүлдегер атанды. Қазақстандық оқушылар әлемдік доданың қорытындысы бойынша «Champions Award» номинациясында екінші орынды иеленді.

Жарысқа әлемнің 56 елінен келген жас инженерлер қатысып, қазақстандық құрама АҚШ, Жапония, Бразилия, Германия, Қытай, Испания және Түркия сияқты алпауыт мемлекеттердің қатысушыларымен бәсекеге түсті. Жеңімпаз команда құрамында Қазығұрт ауылындағы Қ. Тұрсынқұлов, Қ. Сәтбаев және А. Макаренко атындағы мектептердің 8 оқушысы өнер көрсетті. Оларды жарысқа Оразхан Бексұлтан бастаған бес жетекші дайындап барды.

Бұл жетістікке жету үшін «Qazygurt» командасы бір жыл бойы дайындалып, халықаралық чемпионатқа жолдаманы бұған дейін өткен «Alem Tech Fest» жарысында жеңіп алған болатын. Аталған ірі жоба ҚР Оқу-ағарту министрлігінің қолдауымен «USTEM Foundation» және «Дарын» республикалық ғылыми-практикалық орталығының ұйымдастыруымен өткен еді.