Қазақстандық оқушылар Еуропалық физика олимпиадасында үздік нәтиже көрсетті

Швецияның Гётеборг қаласында физика пәні бойынша 10-шы Еуропалық олимпиада (EuPhO 2026) өз мәресіне жетті. Халықаралық білім додасына әлемнің 41 елінен 200-ден астам дарынды оқушы қатысып, өз білімдерін сарапқа салды, деп хабарлайды ҚР Оқу ағарту-министрлігі.

Қазақстан ұлттық құрамасы аталған бәсекеде жоғары дайындық деңгейін көрсетіп, қоржынына 3 күміс және 1 қола медаль салды.

Күміс жүлдегерлер: Арғын Сейтқамит (Астана қ., NIS), Таир Әбдіқадыр (Қостанай обл., «Білім-инновация» лицейі) және Мерген Сабыров (Астана қ., NURORDA мектебі).

Қола жүлдегер: Абылайхан Жоламан (Алматы қ., NURORDA мектебі).

Оқушыларды халықаралық олимпиадаға даярлау және үйлестіру жұмыстарын Әл-Фараби атындағы ҚазҰУ-дың аға оқытушысы Бекмырза Бейсенов пен халықаралық жарыстардың жүлдегері Темірлан Исмағұлов жүзеге асырды.

Еуропалық физика олимпиадасы қатысушылардың теориялық білімі мен эксперименттік дағдыларын бағалайтын беделді алаң болып табылады. Отандық оқушылардың бұл жетістігі Қазақстанның халықаралық білім кеңістігіндегі беделін нығайтып, жас физиктердің кәсіби әлеуетін тағы бір мәрте дәлелдеді.