Қазақстандық оқушы Стэнфорд пен Гарвардта жасанды интеллект жобаларын іске асырып жүр

Астана қаласындағы Nurorda мектеп-лицейінің оқушысы Әлімжан Бектұров технология, кәсіпкерлік және экология салаларын ұштастырған практикалық бағытын қалыптастырып келеді. Ол робототехника мен жасанды интеллектке негізделген жобалар арқылы нақты әлеуметтік және экологиялық мәселелерді шешуге ұмтылады. Бұл жөнінде Ulysmedia жазды.

Әлімжанның алғашқы ірі тәжірибелерінің бірі – Стэнфорд университетінің кәсіпкерлік бағдарламасына қатысуы болды. Халықаралық команда құрамында ол EarlyBirdie атты жасанды интеллектке негізделген сервисті әзірледі. Жоба күнделікті әдеттерді қалыптастыру мен тапсырмаларды бақылауға арналған нақты өнім ретінде жасалды: MVP құрастырылып, пайдаланушы сценарийлері мен ауқымдау мүмкіндігі бағаланды. Нәтижесінде жоба бағдарлама менторларынан жоғары баға алған.

Келесі кезеңде Әлімжан Гарвард университеті жанындағы Amplify Institute зерттеу бағдарламасына қатысып, деректерді талдау, жасанды интеллект және AGI бағытында жұмыс істеді. Бұл тәжірибе оған ИИ-дің әлеуметтік маңызы бар жүйелерде қалай қолданылатынын, алгоритмдердің тұрақтылығы мен деректерді дұрыс түсіндірудің маңызын терең түсінуге мүмкіндік берді.

Инженерлік практиканы ол Қазақстанда, Шығыс Қазақстан облысындағы гидроэлектростанцияда өтті. Сол жерде Әлімжан су қоймасын бақылауға арналған KARBAL мониторинг жүйесін ұсынды. Қазіргі таңда бұл жоба патенттеу кезеңінен өтіп жатыр. Пилоттық сынақ идеяның жұмыс істейтінін көрсеткенімен, инженерлік шешімдерді нақты бюджет пен инфрақұрылым жағдайына бейімдеу қажеттігін де аңғартты.

Экологиялық бағыттағы жұмысы University College London-мен бірлескен зерттеу жобасында жалғасын тапты. Әлімжан маржан рифтерін роботтандырылған жүйелер арқылы бақылау мәселесін зерттеп, экожүйелерді қорғауда жасанды интеллект пен робототехниканы қолдану жөнінде ғылыми жұмыс ұсынды.

Жалпы, Әлімжан Бектұровтың тәжірибесі кездейсоқ жетістіктер жиынтығы емес, бірізді логикаға құрылған даму жолын көрсетеді. Академиялық білім – әдіснамалық негіз болса, кәсіпкерлік идеялардың өміршеңдігін тексереді, ал далалық жобалар технологияны нақты жағдайға бейімдейді. Бұл бағыттың өзегінде – зертханада ғана емес, шынайы өмірде де жұмыс істейтін шешімдер жатыр.