Қазақстандық ғалымдар жүрек ауруын ерте анықтауға мүмкіндік беретін әдіс ойлап тапты

Nazarbayev University ғалымдары жүрек-қан тамырлары ауруларын диагностикалаудың жаңа деңгейіне жол ашатын бірегей зерттеу жүргізіп, Америкалық жүрек қауымдастығының (AHA) назарын аударды.

Әлемде алғаш рет зерттеушілер жүректің жаңа биомаркері – гемодинамикалық күштерді екі визуализация әдісі арқылы (ультрадыбыстық эхокардиография және магниттік-резонанстық томография, яғни МРТ) бір мезгілде салыстырған.

Зерттеу нәтижелері Nature: Scientific Reports журналында жарияланып, 2025 жылы АҚШ-тың Жаңа Орлеан қаласында өткен American Heart Association конференциясында таныстырылды.

Зерттеуге бір топ дені сау еріктілер қатысып, бұл әдістердің көрсеткіштерін дәл салыстыруға мүмкіндік берді. Ғалымдар ультрадыбыстық зерттеу МРТ-мен салыстырғанда жүйелі түрде төмен көрсеткіш беретінін анықтады. Демек, бұл екі әдістің мәліметтерін бір-бірін алмастыра қолдануға болмайды. Клиникалық тәжірибеде мұндай айырмашылықтарды міндетті түрде ескеру қажет.

Гемодинамикалық күштер – жүрек жұмысының бастапқы бұзылыстарын симптомдар байқалмай тұрып анықтауға мүмкіндік беретін жаңа көрсеткіш. Қазақстандық зерттеушілер алғаш рет дені сау адамдарға арналған эталондық мәндерді анықтап, бұл деректерді әлемнің жетекші кардиологтары пайдалана алады.

«Америкалық жүрек қауымдастығының мойындауы – Nazarbayev University-дегі жүрек-қан тамырлары саласындағы зерттеулердің жоғары деңгейін және Қазақстанның әлемдік ғылымға қосқан үлесін көрсетеді», — деді NU Медицина мектебінің зерттеушісі Айжан Жанқоразова.

Мамандардың айтуынша, бұл зерттеу жүрек визуализациясы саласында жаңа ғылыми бағыттың басталуына негіз болады. Ал әлемдік стандарттарға сай осындай тәжірибенің дәл Қазақстанда жүзеге асуы отандық медициналық ғылымның әлеуетін дәлелдейді.