Қазақстанда мұғалімдерді аттестаттаудың жаңа жүйесі енгізіледі

2026 жылғы 1 қыркүйектен бастап Қазақстанда мұғалімдерді  аттестаттаудың жаңа форматы пилоттық режимде іске қосылады. Бұл туралы Оқу-ағарту министрлігінің тиісті бұйрығында көрсетілген.

Жаңа жоба мұғалімдердің кәсіби біліктілігін бағалауды цифрландыруға бағытталған. Пилоттық жобаға қатысу ерікті түрде жүзеге асырылады. Аттестаттаудан өтуді қалайтын педагогтер арнайы онлайн платформа арқылы өтініш бере алады. Жоба аясында әр мұғалімнің кәсіби цифрлық профилі жасалады. Ол мемлекеттік ақпараттық жүйелер мен дерекқорлардан алынған мәліметтер негізінде қалыптастырылады.

Цифрлық профиль белгіленген талаптарға сай болған жағдайда педагогтер біліктілік деңгейін бағалау кезеңінен және қызмет нәтижелерін кешенді талдау рәсімінен өтеді. Бағалау нәтижесі бойынша бұрынғы «екінші санатты» оқытушуларға «педагог-модератор», ал «бірінші санатты» және «жоғары санатты» мұғалімдерге «педагог-сарапшы» біліктілік санаты берілуі немесе расталуы мүмкін.

Педагогтердің цифрлық профилін арнайы комиссия 1 қыркүйек пен 15 желтоқсан аралығында қарайды. Қарау қорытындысы бойынша мұғалімнің мәлімделген санатқа сәйкестігі немесе сәйкес еместігі туралы шешім қабылданады. Берілген немесе расталған біліктілік санаты бес жыл мерзімге жарамды болады.

Айта кетейік, пилоттық жобаны іске асыру туралы бұйрыққа Оқу-ағарту министрі 2026 жылғы 5 маусымда қол қойған. Құжат 1 тамыздан бастап күшіне еніп, жыл соңына дейін қолданылады.