Қазақстанда әлемдік деңгейдегі KAIST университеті ашылады

Бұл туралы Ғылым және жоғары білім министрі Саясат Нұрбек мәлімдеді.

"Бүгін Оңтүстік Корея президентінің сапары аясында білім саласына, ғылым саласына қатысты өте жақсы сүйінші жаңалықтарды бөліскім келеді. Кеше Кореяның ғылым және ақпараттық технологиялар министрі Ли Чжон Хо мырзамен, Кореяның ең мықты зерттеуші университеті KAIST-пен арнайы меморандумға қол қойдық. Енді Корея үкіметі мен KAIST университетінің көмегімен Қазақстанда KAIST Kazakhstan деген халықаралық деңгейдегі зерттеуші университет пайда болады", – деп сүйінші хабарды бөлісті министр.

Саясат Нұрбек Корея тарапы толыққанды ішкі бағдарламаларын, академиялық мазмұнын бөлісуге дайын екенін айтты. Сондай-ақ KAIST-тың бұрынғы президенті де елімізге келіп, көмектесуге даяр.

"Бұл – өте жақсы жаңалық. Неге десеңіз, KAIST 1971 жылы Stanford университетінің көмегімен аяққа тұрған. Ол кезде АҚШ Кореяға қатты көмектескен. Қазіргі таңда Азиядағы ең мықты зерттеуші университеттердің бірі. Тек PhD және магистратура бағдарламаларымен жұмыс істейді. Яғни зерттеушілерді дайындайды. Сол университеттің 50 жылдан астам тәжірибесін Қазақстанға әкелетін боламыз", – деді ведомство басшысы.

Оның айтуынша, университетті Алматы маңайында салу жоспарланып оытр. Бірақ қайда салынатыны әлі нақты шешілмеген.