Қазақстан Тәрбие жөніндегі халықаралық ұйым құруды ұсынды

Астанада 9 қыркүйекте ҚР Оқу-ағарту министрлігі мен “БІЛІМ-ИННОВАЦИЯ” Халықаралық қоғамдық қорының ұйымдастыруымен «Адал азамат» біртұтас тәрбие бағдарламасының әлеуметтік ықпалы мен маңызына арналған дөңгелек үстел өтті.

Дөңгелек үстелге ҚР Оқу-ағарту министрі Ғани Бейсембаев, сенатор Бибігүл Жексенбай, Ұлыбритания және Сингапурдан келген халықаралық сарапшылар, «Білім–Инновация» ХҚҚ президенті Дархан Өте, SDU университетінің ректоры Әлімжан Игенбаев, басқа да қазақстандық білім ұйымдарының басшылары қатысты.

Күн тәртібінде құндылықтарға негізделген бағдарламалардың халықаралық тәжірибесін таныстыру, мектептегі тәрбиені бағалау-зерттеу әдістерін күшейту, ата-ана–мектеп–қоғам ынтымақтастығын кеңейту мәселелері талқыланды.

Ұлыбританиялық профессор Том Харрисон Қазақстанда құндылықтарға негізделген білім беру саласында жақсы тәжірибелерді көріп жүргенін айтты.

“Мінез-құлық тәрбиесінде біз үшін бастысы – оның айқын әрі нақты болуы: ол үлгі арқылы сіңуі (caught), арнайы оқытылуы (taught) және оқушының өзі іздеп табуы (sought) қажет. Мұның барлығы оқу бағдарламасында анық көрінуі тиіс. Қазақстандағы жаңа бағдарлама бұл бағытты нақтылап, құндылыққа негізделген білімнің әрқашан жақсы білімнің бір бөлігі болып келгенін, енді оның негізгі өзекке айналғанын көрсетіп отыр”, – деді профессор Qrnews тілшісіне.

Профессордың айтуынша, тәрбие бағдарламаларының ұзақмерзімді ықпалын өлшеу оңай шаруа емес.

“Мінез адамның бүкіл өмірі бойы қалыптасады. Оны математика немесе ағылшын тілі секілді тест арқылы өлшеу мүмкін емес. Дегенмен белгілі бір әдістер бар. Мәселен, оқушылардың бойында адалдық, сенім, жауапкершілік сияқты қасиеттердің мектептегі уақыт ішінде қалай дамып жатқанын бақылауға болады. Оны оқушылардың мінез-құлқынан, сабаққа қатысуынан, үлгерімінен, сондай-ақ бітірген соң жұмысқа орналасуынан байқауға болады. Өйткені жақсы мінез осының барлығымен тікелей байланысты”, – деп ой бөлісті ол.

Ал сингапурлық профессор Ляо Шао Цзюнь Сингапурдағы Character and Citizenship Education бағдарламасының нәтижесі туралы айтты. Оның сөзінше, бағдарлама балалардың сенімділігін арттырды, олар құндылықтарын өмірде іске асырып, әр ісінің мән-мағынасын түсіндіре алатын деңгейге жетті. 

«Балалар “егер бір нәрсе істесем, ол мәнді болуы керек” деген ұстанымды көбірек айта бастады. Бұл – уақыт өте келе қалыптасқан маңызды өзгеріс», – деп жауап қатты ол Qrnews сауалына.

Сарапшы Қазақстан тәжірибесін де жоғары бағалады.

 «Сіздер мінез-құлық тәрбиесінде ойлағанымнан да көп іс атқарған екенсіздер. Менің ойымша, Қазақстан мен біз әлемге бірге ұсына алатын тәжірибелер көп. Әсіресе біздің азиялық құндылықтарымыз, білім беру философиямыз тұрғысынан айтарымыз бар», – деп бөлісті ол.

SDU университетінің ректоры Әлімжан Игенбаев университет қабырғасында Jubilee Centre-мен әріптестікте құндылыққа негізделген тәрбие бойынша зерттеу орталығы ашылғанын хабарлады. Орталықтың мақсаты – Қазақстандағы құндылықтарға негізделген оқыту-тәрбие жүйесінің ғылыми тұрғыдан зерттелуіне платформа жасап, оны жоғарғы оқу орын деңгейінде әрі қарай дамыту жолдарын қарастыру.

Шара соңында Оқу-ағарту министрі Ғани Бейсембаев халықаралық әріптестерге құндылықтарға негізделген Халықаралық тәрбие жөніндегі ұйым құруды ұсынды.

«Егер Сингапур, Ұлыбритания, бәріміз бірігіп, құндылықтарға негізделген Әлемдік тәрбие ұйымын құратын болсақ, меніңше, барлық мемлекет оған атсалысады. Қазақстан штаб-пәтер болуға дайын. Үйлестіруді Ұлттық білім академиясына жүктеуге не министрлік жанынан арнайы құрылым құруға болады», – деді министр.

Іс-шара қорытындысы бойынша Сингапур және Ұлыбританиямен бірлесіп Халықаралық тәрбие жөніндегі ұйым құру жұмысы басталатын болды.

Айта кетейік, биылғы 1 қыркүйектен бастап “Адал азамат”бағдарламасы елдегі барлық білім беру ұйымында, соның ішінде жекеменшік мектептерде де енгізіліп жатыр.