Қазақстан мектептерінде жаңа пәндер енгізіледі

Жаңа оқу жылынан бастап Қазақстан мектептерінде бірнеше жаңа міндетті пән енгізіледі. Бұл туралы Үкімет отырысында Оқу-ағарту министрі Жұлдыз Сүлейменова мәлімдеді.

Министрдің айтуынша, жаңартылған оқу бағдарламалары жаңа Конституция талаптарына сәйкес әзірленген. Енді білім беру жүйесінде теориялық біліммен қатар оқушылардың азаматтық жауапкершілігін қалыптастыру мен қауіпсіз өмір сүру дағдыларын дамытуға басымдық беріледі.

Жаңа пәндердің бірі – 5–7-сыныптарға арналған «Конституция негіздері». Бұл пәнде оқушылар Қазақстанның конституциялық құрылысы, азаматтардың құқықтары мен міндеттері, мемлекеттік басқару жүйесі және құқықтық мәдениет туралы білім алады.

8–11-сыныптарда «Заң мен тәртіп» міндетті курсы оқытылады. Оның мақсаты – құқықтық сананы қалыптастыру, құқық бұзушылықтың алдын алу, заңға құрмет пен азаматтық жауапкершілікті күшейту.

Сонымен қатар 5–11-сынып оқушылары үшін «Жеке қауіпсіздік» пәні енгізіледі. Бұл курста ақпараттық қауіпсіздік, кибергигиена, төтенше жағдайларда әрекет ету және қауіптің алдын алу дағдылары оқытылады.

Жұлдыз Сүлейменованың айтуынша, мектептерде «Адал азамат» тәрбие бағдарламасының құндылықтары, «Заң мен тәртіп» қағидаты, «Таза Қазақстан» бастамасы және жаңа Конституцияның негізгі қағидалары оқу-тәрбие үдерісіне толық енгізіледі. Осылайша мектеп заңды құрметтейтін, еңбекқор әрі қоғам алдындағы жауапкершілігін сезінетін азаматтарды тәрбиелеуге басымдық береді.