Қазақстан мектептерінде жаңа мамандық пайда болады

Елімізде жастардың 20%-ға жуығы мамандық бойынша еңбек етпейді. Сәйкесінше мамандық бойынша жұмыс істемегені үшін жалақысы 15%-ға төмендейді. Бұл деректі «Еңбек ресурстарын дамыту орталығының» аналитиктері келтірді.

Оқу-ағарту министрлігі бұл проблеманы шешу үшін мектептерге педагог-кәсіби бағдар беруші мамандығын қоспақ. Ведомство "Педагог лауазымдарының тізбесін бекіту туралы" бұйрыққа толықтыру әзірледі. Тиісті құжат "Ашық НҚА" порталында жарияланды. Қоғамдық талқылау 8 сәуірге дейін жалғасады.

Ведомство түсіндіргендей, кәсіби бағдар беруші лауазымы мектеп оқушыларының болашақ мамандығын саналы түрде таңдауын үйлестіру үшін қажет.

17 жыл өтілі бар профориентолог Динара Төлеуқызының айтуынша, елімізде профориентация саласы енді ғана дамып келе жатыр.

“Оқушылар мен ата-аналардың 100%-дан 10%-ы ғана профориентациядан өтіп, өз бағытын анықтауда. Бұл көрсеткіштің өте аз екені айтпаса да түсінікті. Көп адам профориентация атауының не екенін де түсінбей жатады”, – деді маман Inbusiness-ке берген сұқбатында.

Оның айтуынша, кәсіби бағыт-бағдар беруші мамандарды колледждер мен ЖОО-ларда арнайы оқыту керек. Себебі елімізде профориентологтарға сұраныс көп.

“Профориентацияны қажетсінетін респонденттер мектеп оқушылары ғана деп ойлау қате. Өйткені мұндай кеңесті оқушылардан бөлек студенттер, оқу орнын тәмамдаған адамдар, жасы 40-тан асқан азаматтар да алып жатады. Арасында университетке түсіп, "бұл мен қалаған мамандық емес, басқасына ауысамын" дейтіндер де бар”, – деп бөлісті маман.

Тәжірибелі маманның пікірінше, мамандық бойынша бағыт беру балабақшада басталуы керек.

“Мектептерде профориентологтардың жұмысын тек 9-11 сыныптарда ғана бастамай (әдетте бізде солай), 1 сыныптан бастаған жөн деп есептеймін. Профориентолог маманның жұмысын ешқандай директор орынбасары немесе психолог атқармауы керек, бұл – үлкен қателік. Осы қызметке бөлек жүктемесі бар мамандар дайындаған абзал. Әр мекемеде бір ғана маман емес, бірнеше кәсіби педагог болу керек", – деді ол.