Интеллектуалды рекорд: Астаналық мектеп түлегі әлемнің 7 елінде білім алуға 85 000 доллар стипендия алды

Елордалық «Spectrum» халықаралық мектебінің түлегі Николай Цой әлемдегі ең жоғары іріктеу талаптарына ие оқу орындарының бірі - Tetr College of Business (Tetr бизнес-колледжі) грантын жеңіп алды.

Халықаралық статистикалық мәліметтерге сүйенсек, аталған колледжге қабылдану деңгейі өте төмен - талапкерлердің 1 пайызынан азы (шамамен 0,12% - 2,6%) ғана іріктеуден өтеді. Мәселен, 2024 жылы әлем бойынша түскен 90 мыңнан астам өтінімнің ішінен бар болғаны 110 студент қана оқуға қабылданған.

Николай Цой «Bachelor in Management and Technology» бағдарламасы бойынша оқуға шақырту алып, 85 000 АҚШ доллары көлеміндегі стипендияны иеленді.

Оқуға түсу процесі екі айдан астам уақытқа созылып, бірнеше күрделі кезеңді қамтыды:

• Арнайы өтінім үлгісін толтыру;
• Tetr Trial — үміткердің танымдық қабілеттерін тексеруге арналған кешенді тест;
• Халықаралық бизнес-индустрия сарапшыларымен сұхбаттасу.

Николайдың айтуынша, оның жеңіске жетуіне тек академиялық бағалар емес, кәсіпкерлікке деген ерекше қызығушылығы мен стартап жобалармен айналысу тәжірибесі шешуші әсер еткен.

«Tetr колледжіне түсушілердің көбінде SAT ұпайы өте жоғары. Мен өзімді академиялық тұрғыдан үздікпін деп санаған емеспін. Алайда, бұл ЖОО ерекшелігі - олар студенттің ойлау жүйесі мен нақты жобаларды дамытуға деген құлшынысына басымдық береді», - деп атап өтті жас түлек.

Tetr College of Business бағдарламасы болашақ көшбасшылар мен кәсіпкерлерді даярлауға бағытталған. Студенттер 4 жылдық оқу мерзімі ішінде әлемнің 7 елінде білім алып, жаһандық деңгейде практикалық тәжірибе жинақтайды.

Қазіргі уақытта Николай Цой басқа да шетелдік жоғары оқу орындарынан (соның ішінде New York University Shanghai) жауап күтуде. Болашақта ол өз білімін қоғамдық мәселелерді шешетін инновациялық кәсіпкерлік жобаларға арнауды жоспарлап отыр.