Халықаралық олимпиаданың күміс жүлдегері 5 млн теңге сыйақы алды

Астана қаласындағы Spectrum International School 12-сынып оқушысы Марғұлан Шарел- математикадан республикалық және халықаралық олимпиадалардың бірнеше мәрте жеңімпазы. Бұл жайында  Spectrum International School инстаграм желісінде хабарлады.

Биыл ол Австралияда өткен беделді IMO халықаралық олимпиадасында күміс медаль жеңіп алды. Ауқымды сайыста 112 елден шамамен 650 талантты оқушы бақ сынаған болатын. Қазақстан құрамасы жалпыкомандалық есепте 17-орынға ие болып, төрт күміс және екі қола медальмен елге оралды.

Марғұланның үздік жетістіктері елеусіз қалмады. Тамыз айында ол мемлекет басшысы Қасым-Жомарт Кемелұлы Тоқаевпен Ақордада кездесті. Президент жеті беделді халықаралық сайыста оза шапқан 27 жүйрікті арнайы шақырып қабылдады. Күміс медаль үшін Марғұлан 3 932 000 теңге көлемінде ақшалай сыйақыға ие болды.

Сонымен қатар жас дарын Хабар арнасының «Жақсы адамдарым» жобасындамарапатталып, 1 млн теңге көлемінде сыйақы алды. Марғұлан бұл қаражатты бұрынғы білім ордасы – Жамбыл облыстық Білім-инновация лицейінің оқушыларына кітаптар сатып алуға жұмсап, олардың сайыстарға дайындалуына қолдау көрсетті.

«Халықаралық олимпиадаға қатысу маған тек ақшалай сыйақы мен iPad әкелген жоқ, ең бастысы – білім мен достар. Бұл сайыстар арқылы Қазақстандағы өзім сияқты талантты жас ғалымдармен танысу мүмкіндігі туады, және мен сенемін, ондай достық берік болады деген сенімдемін».

«Ұлттық құраманың мүшесі ретінде тоқтауға болмайды. Алда үлкен мақсаттар бар, соларға жету үшін күн сайын еңбек ету қажет», – деді Марғұлан.

Дарынды оқушы өз қатарластарына да кеңес берді.

 «Мен үшін математика – жай пән емес. Әр есеп жаңа элементтің есігін ашатын мүмкіндік сияқты. Сондықтан барша жасқа өз бағытын ертерек анықтап, сол жолда табандылықпен еңбек етуді тілеймін», – деп түйіндеді жас математик.

еңбек етуді тілеймін», – деп түйіндеді жас математик.