Халықаралық олимпиадада орын алған оқушылар 5,5 млн теңгеге дейін сыйақы алады

Әлемдік деңгейдегі білім бәйгелерінде жеңіске жеткен қазақстандық оқушыларға мемлекет тарапынан 5,5 миллион теңгеге дейін сыйақы тағайындалады. Биыл осындай қолдауға 26 жасөспірім ие болды. Оқушыларды дайындаған ұстаздар да сый-сияпатпен марапатталды. 

Халықаралық физика олимпиадасына қатысқан Әмір Пішенбаев 46 елдің білімпаздарымен сынға түсіп, екінші орынға ие болды. Әмір сыйақы ретінде 1000 АЕК мөлшерінде қаржы алған.

"Ақшаның көбін анама беріп, қалғанын болашаққа сақтап қойдым. Енді физикадан алтын медаль алуға тырысамын", – деді Әмір 24kz-ке. 

Оқушының ұстазы Жақсылық Ақынұлы да бір реттік төлемге ие болды. Өзі де кезінде олимпиадаға қатысып, алтын медаль алған ұстаз қазіргі қолдаудың бұрынғыға қарағанда әлдеқайда үлкен екенін айтады.

"Ол кезде мұндай ірі сыйақылар мен гранттар берілмейтін. Қазір меценаттар да қолдау көрсетсе, оқушыларға сыйлық ретінде ең болмаса велосипед немесе тай мінгізсе жақсы болар еді", – деді ұстаз 24kz-ке.

Бір реттік сыйақы әлемдегі ең беделді 7 білім бәйгесінде жүлделі орын алғандарға беріледі. Оқушылар үшін 500-ден 1500 АЕК-ке дейін қаражат қарастырылса, ұстаздарға базалық лауазымдық жалақының 8,5-тен 26,5 еселенген мөлшерінде сыйақы беріледі. 

«Дарын» республикалық ғылыми-практикалық орталығының бөлім басшысы Ажар Рахлетованың айтуынша, 2022 жылдан бері Президенттің тапсырмасы бойынша халықаралық олимпиада жеңімпаздары мен жүлдегерлеріне бір реттік сыйақы беріліп келеді. Биыл 26 жеңімпаз оқушы мен 24 педагог марапатталса, өткен жылы 23 оқушы және 20 педагог марапатталған болатын. Сонымен қатар халықаралық олимпиада жүлдегерлеріне жоғары оқу орындарының гранттары тағайындалады. Биыл 6 түлек осындай қолдауға ие болған.