Грант конкурсына құжат қабылдау басталды: нені білу керек?

Қазақстанда бүгіннен бастап жоғары білімнің мемлекеттік гранттары конкурсына қатысу үшін талапкерлерден өтініш қабылдау басталды. Бұл туралы Ғылым және жоғары білім министрлігі хабарлады.

Өтініштер 20 шілдеге дейін қабылданады. Құжаттарды жоғары оқу орындарындағы қабылдау комиссиялары арқылы, виртуалды қабылдау комиссиялары немесе eGov порталы арқылы тапсыруға болады.

Талапкерлер жеке куәлігін, ҰБТ сертификатын, фотосуретін, мектеп аттестатын немесе техникалық және кәсіптік білім туралы дипломын, сондай-ақ жеңілдік санатына жататынын растайтын құжаттарды (бар болса) ұсынуы қажет.

Грант конкурсына қатысу және ақылы бөлімге түсу үшін ең төменгі шекті балл да белгіленген. «Педагогика» және «Құқық» бағыттарына – кемінде 75 балл, «Денсаулық сақтау» бағытына – 70 балл, ұлттық жоғары оқу орындарына – 65 балл, қалған университеттерге – кемінде 50 балл жинау қажет.

Министрлік жоғары оқу орындары өздерінің шекті балын дербес белгілей алатынын еске салды. Сонымен қатар ауыл жастары мен әлеуметтік тұрғыдан осал топтарға арналған мемлекеттік квоталар сақталады.

Білім гранты иегерлерінің тізімі 10 тамызға дейін жарияланады.