Ғимараты тозық, білімі озық: Берік Уәли Семейдегі БИЛ-ге арнайы барды

Абай облысының әкімі Берік Уәли Семей қаласына жұмыс сапары барысында дарынды балаларға арналған «Білім-Инновация лицейі» лицейінің тыныс-тіршілігімен танысты.

Аймақ басшысы оқу үдерісін, материалдық-техникалық базаны көріп, оқу орнының өзекті мәселелеріне назар аударды. Лицей орналасқан ғимарат 1984 жылы балабақша ретінде салынған, ал білім беру ұйымы 1994 жылдан бері жұмыс істейді. Қазіргі таңда мұнда 222 оқушы білім алып, 31 мұғалім еңбек етеді.

Лицей білім сапасын нақты нәтижелермен дәлелдеп келеді. Оқу орны республикалық пән олимпиадасының қорытындысы бойынша «100 үздік олимпиадалық мектеп» қатарына енген. Сонымен қатар «Үздік ұйым – 2025» облыстық байқауында жеңімпаз атанып, 30 млн теңге көлемінде грантқа ие болды. Лицей 2011 жылдан бері облыстың үздік олимпиадалық командасы мәртебесін сақтап келеді.

Мектеп интернаттық режимде жұмыс істейді. Алайда материалдық-техникалық базаның ескіруі, оқу кабинеттерінің тарлығы секілді мәселелер бар. Лицей директоры Серік Айдарбеков жаңа ғимарат салу қажеттігін көтерді.

Берік Уәли оқу кабинеттері мен спорт залды аралап, оқушылар және ұстаздармен тілдесті. Аймақ басшысы лицейдің жетістіктеріне жоғары баға беріп, жаңа ғимараттың жобалық-сметалық құжаттамасы дайын екенін, оны Үкіметке ұсынып, қаржыландыру мәселесін көтеретінін айтты.