Германия жастары білім алудан неге бас тартып жатыр?

Германия жастарының бір бөлігі кәсіби білім алуға деген ынтасын жоғалтып жатыр. Bertelsmann қоры жүргізген зерттеу нәтижесіне сәйкес, 14 пен 25 жас аралығындағы әр бесінші жас мектепті немесе колледжді аяқтамай-ақ бірден жұмыс істеуге көшкісі келеді. Бұл туралы DW хабарлады.

Кәсіптік білімнен бас тарту тренді кімдер арасында жиі байқалады?

Мұндай тенденция әсіресе білімі төмен жастар арасында жиі кездеседі. Зерттеуге қатысқан жастардың ішінде білім деңгейі төмен әрбір төртінші жас мектеп немесе колледж бітірмей-ақ жұмысқа орналасуды жөн көреді. Сарапшылардың айтуынша, бұл жағдай Германия экономикасына қауіп төндіреді, өйткені біліктілігі жоқ жұмысшылардың үлесі артып келеді.

Білім алуға не кедергі?

Жастардың айтуынша, кәсіптік білім алуға басты екі кедергі бар:

• Өтініш беру жолдарын білмеу;

• Білім деңгейінің жеткіліксіздігі.

Bertelsmann қорының сарапшысы Хелен Ренктің айтуынша, қолдау жүйесі әр кандидаттың жеке жағдайына сай бейімделуі керек. Ол жастарға жұмысқа орналастыру агенттіктерінен арнайы кеңесшілер бөлуді ұсынады.

Ал білім деңгейі жоғары жастар арасында ақпараттың тым көптігі – басты мәселе. Олар болашақ мамандығын таңдай алмай дал. Кәсіптік бағдар беру бағытындағы жеке кеңес мектептерде жеткіліксіз, дейді зерттеушілер.

Экономикаға төнетін қауіп

Bertelsmann қорының сарапшылары мемлекет жастарды кәсіптік білім алуға ынталандыратын жедел шаралар қабылдауы керек екенін айтады. 2023 жылы 20–34 жас аралығындағы 3 миллионға жуық адам (19%) ешқандай кәсіби біліктілікке ие болмаған. Кёльн қаласындағы Неміс экономикасы институтының дерегінше, өткен жылы ел бойынша 570 мыңнан астам білікті маман жетіспеді.

"Кәсіптік білім – жастар үшін жұмыссыз қалмаудың және төмен жалақысы бар секторда қалып қоймаудың кепілі. Сондықтан кәсіби білім алуды қызықты әрі тартымды ету керек", – дейді сарапшы Хелен Ренк.

Болашаққа үміт бар ма?

Зерттеу көрсеткендей, жастардың басым бөлігі әлі де оқуын жалғастыруға ынталы. Оқушылардың 43 пайызы кәсіптік білім алуды жоспарласа, 40 пайызы университетке түскісі келеді.

Алайда білім деңгейі төмен жастардың 35 пайызы мектептен кейін оқуын жалғастыра алатынына сенбейді. Көбіне уақытша жұмыс істеп кетіп, кейін мүлде білім алуға оралмайды. Сарапшылардың айтуынша, мұндай жастар еңбек нарығы үшін үлкен әлеуетке ие. Оларға бағытталған нақты қолдау қажет.

2022 жылғы Ұлттық білім беру есебі бойынша, 52 300 жас мектепті аттестатсыз бітірген. Оларды кәсіптік білімге бейімдеп, қолдау көрсету – Германияның еңбек нарығы мен болашағы үшін маңызды, дейді Bertelsmann қорының тағы бір сарапшысы Клеменс Виланд.