Гарвардта қанша қазақстандық оқып жатыр?

АҚШ президентінің әкімшілігі Гарвард университетінің шетелдік студенттерді қабылдау құқығын тоқтатқаннан кейін Қазақстанның Ғылым және жоғары білім министрлігі аталған оқу орнындағы қазақстандық студенттерге қатысты түсініктеме берді.

Министрліктің баспасөз хатшысы Олжас Беркінбаевтың Facebook парақшасында жазған мәліметіне сәйкес, қазіргі таңда «Болашақ» бағдарламасы бойынша Гарвардта 7 студент білім алып жатыр.

— Қазіргі уақытта «Болашақ» бағдарламасы бойынша Гарвард университетінде 7 адам оқып жатыр, — деп жазды ол.

Ал өз қаражатына немесе басқа бағдарламалар арқылы оқып жатқан студенттер туралы ақпарат министрлікте әзірге жоқ.

— Мұндай жағдайлар бойынша тиісті сұраулар жолданады, — деп мәлімдеді баспасөз хатшысы.

Еске салайық, бұған дейін АҚШ билігі Гарвард университетінің шетелдік студенттерге арналған алмасу бағдарламаларын жүзеге асыру құқығын алып тастаған болатын. Бұл шешім университеттің F және M санатындағы студенттік визалар үшін қажетті құжаттарды беруге рұқсаты жоқ екенін білдіреді. Яғни, Гарвард енді жаңа шетелдік студенттерді қабылдай алмайды, ал қазіргі студенттер басқа университетке ауыспаса, елден кетуге мәжбүр болады.