Ғани Бейсембаев елордалық білім беру ұйымдарының директорларымен кездесті

Оқу-ағарту министрі Ғани Бейсембаев Астана қаласындағы білім беру ұйымдарының директорларымен кездесу өткізді. Жиында білім сапасын арттыру, өткен жылдың қорытындылары және биылғы жоспарлар талқыланды.

Астана қаласы Білім басқармасының мәліметінше, былтыр елордада 24 жаңа мектеп ашылды, оның 16-сы «Жайлы мектеп» ұлттық жобасы аясында салынған. Сондай-ақ мемлекеттік тапсырыс пен ваучерлік қаржыландырудың енгізілуі нәтижесінде балабақша кезегі екі есеге қысқарды. Қазіргі уақытта 20 балабақшада «Тілге бойлау» жобасы жүзеге асырылуда.

Жұмысшы мамандықтарын дамыту жылы аясындағы жоспарлар

Мемлекет басшысы жариялаған Жұмысшы мамандықтарының жылы аясында Астанада алты бағыт бойынша 100-ден астам іс-шара өткізу жоспарланып отыр. Мектептер мен колледждерде «Жаңа кәсіптер атласы» жобасы жалғасады. Сонымен қатар, колледждерде мемлекеттік тапсырыс көлемін 10 мың орынға дейін арттыру жоспарланған. Техникалық және кәсіптік білім беру ұйымдарының студенттерін қолдау мақсатында Ұлттық құзыреттілік орталығын ашу мәселесі қарастырылып жатыр.

Басты мақсат – қауіпсіз және жайлы орта

Ғани Бейсембаев білім беру жүйесін дамытудағы басты басымдықтарды атап өтті.

«Басты міндетіміз – балалар үшін барынша қауіпсіз және жайлы орта құру. Астана білім беру жүйесі басқа өңірлерге үлгі болуы тиіс. Осы мақсатта министрлік әкімдікке қолдау көрсетуге дайын. Нәтижесінде, үш ауысымды мектептердің және орын тапшылығы сақталған алты мектептің мәселесі шешілді. Сонымен қатар «Білім берудегі 1000 көшбасшы» жобасы аясында жоғары білікті кадрлармен қамтамасыз ету жұмыстары жүргізіліп жатыр», – деді министр.

Қазіргі таңда Астананың 877 білім беру ұйымында 400 мыңға жуық бала оқиды. Бұл көрсеткіш өткен жылмен салыстырғанда 30 мыңға артқан. 2027 жылға дейін елордада 131 мың оқушыға арналған 63 жаңа мектеп салу жоспарланып отыр.