Ғалымдар алғаш рет екі адамды түсінде "сөйлестірді"

Ғалымдар ғылыми фантастикаға бір қадам жақындап, алғаш рет екі адамды түсінде "сөйлестірді". Бұл таңғажайып эксперимент АҚШ-тың Калифорния штатында орналасқан REMspace стартапы арқылы жүзеге асырылды. Компания ұйқыны жақсарту және түстерді саналы түрде басқару технологияларын жасап, осы технологиялар арқылы екі адамға ұйқы кезінде хабарлама алмасуға мүмкіндік берді. Бұл туралы DailyMail хабарлады.

REMspace компаниясы бұл тәжірибені "арнайы жабдықтар" көмегімен жүргізген. Оның құрамына "сервер," "аппарат," "Wi-Fi" және "сенсорлар" кіргенімен, нақты қандай технологиялар қолданылғаны көрсетілмеді.

Зерттеушілер экспериментке қатысушыларды екі бөлек үйде ұйықтатып, олардың арасында арнайы жасалған тілде сөз жіберген.

"Кеше ғана түстерде қарым-қатынас жасау ғылыми фантастика сияқты көрінетін, ал ертең бұл технологиясыз өмірімізді елестету қиын болады", – деп мәлімдеді REMspace негізін қалаушы және бас директоры Майкл Радуга.

Бұл технология әлі де ғалымдар тарапынан шолу мен тексеруден өтпеген, бірақ егер нәтижелері расталса, ұйқыны зерттеудегі үлкен жетістік болмақ. REMspace компаниясының айтуынша, мұндай технология психикалық денсаулықты жақсарту, дағдыларды үйрету және басқа да салаларда қолданылуы мүмкін.

Эксперимент барысында қатысушылардың ми толқындары арнайы қондырғылармен қашықтан бақыланды. Қатысушылардың бірі саналы түске енген сәтте сервер кездейсоқ сөз шығарып, оны құлаққап арқылы оған жіберді. Ол сөзді түсінде қайталағаннан кейін, сервер оны жазып алды. Біраз уақыт өткен соң, екінші қатысушы да саналы түске еніп, сервер алғашқы қатысушы жіберген сөзді оған жеткізді. Екі қатысушының да түсте айтқан сөздері сәйкес келген.

REMspace экспериментті тағы бір жұппен қайталады, бірақ технологияның нақты жұмыс істегенін дәлелдеу үшін зерттеу қосымша тексерулерден өтуі қажет. Радуга алдағы уақытта саналы түстерде шынайы уақыт режимінде қарым-қатынас орнатуды мақсат етіп отырғанын атап өтті.

Бұл жаңа технология болашақта коммуникация мен қарым-қатынас ұғымдарын түбегейлі өзгертеді деп болжанады.