Енді мұғалімдер сабақтан тыс уақытта оқушылар үшін жауап бермейді

Мәжіліс «Педагог мәртебесі және білім беру мәселелері бойынша кейбір заңнамалық актілерге өзгерістер мен толықтырулар енгізу туралы» заң жобасын жұмысқа қабылдады. Бұл туралы пленарлық отырыста депутат Асхат Аймағамбетов мәлімдеді.

Оның айтуынша, түзетулерге сәйкес педагогтердің оқушылардың өмірі мен денсаулығына қатысты жауапкершілігі тек оқу процесі кезеңімен шектеледі. Сабақтан тыс уақытта, каникул кезінде және кешкі мезгілде жауапкершілік ата-аналарға немесе заңды өкілдерге жүктеледі.

Тиісті норма «Педагог мәртебесі туралы» заңның 6-бабына енгізіледі. Түсіндірме жазбада бұл өзгеріс мұғалімдерді өз құзыретіне кірмейтін жағдайлар үшін тәртіптік немесе әкімшілік жауапкершілікке негізсіз тартудан қорғауға бағытталғаны көрсетілген. Құжатта практикада педагогтер мен мектеп директорлары оқу орнынан тыс болған оқиғалар үшін жазаланған жағдайлар кездескені айтылған.

Сонымен қатар «Ата-аналардың және өзге де заңды өкілдердің құқықтары мен міндеттері» туралы 49-бап екі тармақпен толықтырылады. Онда ата-аналардың педагогтің құқығын құрметтеуі, білім беру ұйымымен жасалған шарт талаптарын сақтауы және баланың сабақтан тыс уақыттағы мінез-құлқы мен қауіпсіздігі үшін жауапты екені нақты көрсетіледі.

Заң жобасы мұғалімдерді екі форматта – қағаз және электронды түрде қатар есеп тапсырудан босатуды, сондай-ақ педагогтерді өз жұмысының нәтижесін әлеуметтік желілерде жариялауға мәжбүрлеуге тыйым салуды көздейді. Бұдан бөлек, құжатта педагогтерді олардың кәсіби міндетіне қатысы жоқ іс-шараларға тартуға жол бермеу нормалары да қамтылған.