Еліміздің мектептерінде жаңа пән пайда болуы мүмкін

Қазақстан мектептерінде жол қозғалысы ережелерін пән ретінде енгізу ұсынылды. Бұл бастаманы Ішкі істер министрлігі Әкімшілік полиция комитетінің төрағасы Қайсар Сұлтанбаев Орталық коммуникациялар қызметіндегі брифингте жария етті, деп хабарлады «24KZ».

Оның айтуынша, қазір мектептерде бұл тақырыпқа жеткілікті көңіл бөлінбей отыр. Соңғы жеті айда жол-көлік апаттарынан 176 бала қаза тапқан. Оның жартысынан көбі – көлік жолаушылары, қалғаны – жаяу жүргіншілер.

Жаңа оқу жылы қарсаңында республика бойынша «Назар аударыңыз – балалар!» акциясы басталды. Ол 10 қыркүйекке дейін жалғасады. Осы уақыт аралығында полиция қызметкерлері мектептердің маңындағы көшелерде бақылауды күшейтеді.

«Біз әр мектепке полиция қызметкерлерін – учаскелік инспекторларды, патрульдік полицейлерді, кәмелетке толмағандар ісі жөніндегі инспекторларды бекіттік. Оқушылардың таңертең мектепке келу, түсте шығу және кешкі уақытта үйлеріне қайту сәттерінде оларды бақылап, қауіпсіздігін қамтамасыз етеміз», – деді Қайсар Сұлтанбаев.

Комитет төрағасы бұл шаралар балалардың жолдағы қауіпсіздігін арттыруға және қайғылы оқиғалардың алдын алуға бағытталғанын атап өтті.