Елімізде ҰБТ басталды

Бүгін Қазақстанда негізгі ұлттық бірыңғай тестілеуді өткізу басталды. Ал су тасқынынан зардап шеккен өңірлердің (Ақмола, Ақтөбе, Атырау, Батыс Қазақстан, Қостанай, Солтүстік Қазақстан) түлектеріне ҰБТ-ға тіркеу уақыты 20 мамырға дейін ұзартылды, тестілеу 25 мамырдан 12 шілдеге аралығында өтеді.

Қазіргі таңда 181 мың талапкер тестілеуге қатысуға өтініш берген. Оның ішінде тапсырушылардың 75%-ы қазақ тілінде, 24,9%-ы орыс тілінде, 221 адам ағылшын тілінде тестілеуден өтуге өтініш білдірді.

Атап өтсек, талапкерлер тестілеу күнін, уақытын және пунктін өздері таңдайды. Бұл ретте олар екі мүмкіндік үшін бейіндік пәндердің бір ғана комбинациясын белгілейді. Комбинацияларға келетін болсақ, қазіргі таңда талапкерлердің 16%-ы «Математика-Физика», 16%-ы «Биология-Химия», 13%-ы «Шығармашылық», 11%-ы «Математика-Информатика» пәндерін таңдады.

«Тестілеуде барлық талапкерлер негізгі ҰБТ-ны екі рет тапсырып, ең үздік нәтижемен грант конкурсына қатыса алады. Жалпы саны 120 сұрақты құрайтын тестілеуде жоғары 140 ұпайды алу мүмкіндігі барша талапкердің еншісінде болмақ. Біз өз тарапымыздан талапкерлеріміздің тестілеу кезінде жайлы сезіну үшін бар жағадайды жасаймыз», - деді Астанадағы ҰБТ өткізу пунктіне барған Саясат Нұрбек.