Елімізде ауыл мектебінің оқушылары арасындағы Республикалық олимпиада басталады

4 қыркүйекте ауыл мектебінің оқушылары арасындағы жалпы білім беретін пәндер бойынша екінші Республикалық олимпиадаға тіркелу ашылды. Өтініштерді қабылдау 20 қыркүйекке дейін жалғасады. Олимпиадаға ауыл мектептерінің 9-11(12) сынып оқушылары қатысады.

Олимпиада төрт кезеңнен тұрады:

I кезең (іріктеу) – 2024 жылдың қыркүйегі;

II кезең (аудандық) – 2024 жылдың қазаны;

III кезең (облыстық) – 2024 жылдың қарашасы;

IV кезең (республикалық) – 2024 жылдың желтоқсаны.

Былтырғы жеңімпаздар пәндер сәйкестігі бойынша биылғы олимпиаданың республикалық кезеңіне барлық кезеңге қатыса отырып, конкурстан тыс қатыса алады.

Қатысу үшін барлық ниет білдіруші auyl.daryn.kz сайтына тіркелуі қажет.

Республикалық олимпиада алғаш рет былтыр Оқу-ағарту министрлігінің бастамасымен өткізілді. Ол Қазақстанның шалғай елді мекендеріндегі дарынды балалардың қабілетін анықтауға және дамытуға бағытталған. Олимпиада барысында ауыл мектебінің оқушыларына толық қолдау көрсетіліп, олар алдағы зияткерлік жарыстарға дайындалу үшін республикалық «Дарын» мектебіне сырттай қабылданады.