«Болашақпен» оқып, талапты бұзғандар енді көбірек айыппұл төлейді

Мемлекеттің миллиондаған қаржысын жұмсап, сенімін ақтамағандар үшін «жақсы заман» аяқталуға жақын. Ғылым және жоғары білім министрлігі «Болашақ» бағдарламасының шартын бұзған стипендиаттарға салынатын айыппұл көлемін бірнеше есеге арттыру мәселесін қолға алды.

Мәжіліс депутаты Магеррам Магеррамовтың «мемлекет қаржысын желге ұшырғандар оқуға кеткен шығыннан да көп ақша қайтаруы тиіс» деген қатаң ұсынысын министр Саясат Нұрбек орынды деп санады. Қазіргі таңда бұл бастама жан-жақты зерттеліп жатыр.

2013 жылдан бері ереже бұзған «болашақтықтар» бюджетке 14,5 миллиард теңге қайтарған. Тек 2026 жылдың алғашқы үш айында ғана мемлекет қазынасына 378,5 миллион теңгеден астам қаражат түскен. Бұл - қаншама жастың шетелде оқып келіп, өз міндетін орындамағанының көрінісі.

Министрдің айтуынша, бұрын айыппұл көлемі шығынның 25%-ын құраған, бірақ 2010 жылы ол 10%-ға дейін жеңілдетілген еді. Енді министрлік бұл «жұмсақтықтан» бас тартып, қаржылық жауапкершілікті қайта күшейтпек. Егер бұл өзгеріс күшіне енсе, бағдарлама шартын бұзғандар тек алған ақшасын ғана емес, үстінен қомақты үстеме ақы төлеуге мәжбүр болады.

«Бұл ұсыныс қаржылық жауапкершілікті жетілдіру тұрғысынан өте тиімді», — деп атап өтті Саясат Нұрбек.

Қазіргі таңда тиісті мемлекеттік органдар бұл идеяны іске асырудың жолдарын қарастыруда.