«Болашақ» түлегі оқу ақысын қайтаруға міндеттелді

Астанада «Болашақ» халықаралық стипендиясы бойынша білім алған түлек өзіне жүктелген міндеттемелерді орындамағаны үшін мемлекетке шығынды қайтаруға міндеттелді. Бұл туралы Астана қалалық сотының баспасөз қызметі хабарлады.

Іс материалдарына сәйкес, 2017 жылы талапкер Ұлыбритания университеттерінің бірінде магистратураны тәмамдаған. Алайда оқу бітіргеннен кейін Қазақстанда міндетті түрде өтеуі тиіс еңбек өтілін толық орындамаған.

Бағдарлама ережесіне сәйкес, түлектер Астанада немесе республикалық маңызы бар қалаларда кемінде бес жыл (1825 күн), ал басқа өңірлерде үш жыл (1095 күн) жұмыс істеуі тиіс. Алайда талапкер Астанада бар болғаны 1489 күн еңбек еткен соң, 2021 жылдың сәуірінде елден кетіп қалған.

Сотта ол 336 күнге созылған қашықтан жұмыс істеген кезеңін еңбек өтілі ретінде есептеуді сұраған. Алайда сот оның талабын қанағаттандырмады. Судьялар еңбек өтеу міндеті тек Қазақстан аумағында физикалық түрде болуды талап ететінін түсіндірді. Қашықтан жұмыс істеу туралы шарт «Болашақ» бағдарламасы ережесіне енгізілмеген.

«Бағдарламаның басты мақсаты – шетелде оқыған білікті мамандарды елге қайтарып, Қазақстан экономикасына инновациялық технологияларды енгізу. Тіпті Еңбек кодексіне енгізілген қашықтан жұмыс істеуге рұқсат беретін өзгерістер де бұл бағдарламаға қатысты қолданылмайды», – делінген сот хабарламасында.

Сондықтан Республикалық комиссия түлекті «Болашақ» стипендиясынан айырып, мемлекет шығынын өтеуге міндеттеген. Оның бұл шешімге қатысты сотқа берген арызы қанағаттандырылған жоқ.